Saad alang sa mga mapaubsanon

Enero 20, 2024, adlawng Sabado sa alas syete sa buntag gisaulog sa GKK Sto. Niño Lanzona ang ilang ika-56 nga kapistahan. Pipila ka mga intensyon ang gibasa una ang Santos nga Misa, mga misa pasalamat sa mga gasang nadawat, pag-ampo alang sa mga espesyal nga katuyoan ug panginahanglan ug apil sab ang mga pangaliya alang sa kahilunaan sa mga kalag.

Sa pasiuna gipahinumdoman nga ang kapistahan panahon sa paghinumdom nga ang Sto. Niño maoy timailhan nga atong nadawat ang atong pagtoo gikan sa mga unang misyonaryo. Kini usab usa ka pagpahinumdom nga ang Ginoong Dios nagpakatawo aron kitang mga tawo, makaambit sa iyang pagka Dios. Ang hagit mao ang pagpabiling mapaubsanon sama nga ang Ginoo misul-ob sa sapot sa ulipon aron kitang mga tawo, iyang maalagaran.

Duyog sa Kura Paroko nga si Reberendo Padre Allan Rodriguez, mikonselebrar usab si Reberendo Padre Felmar Caras, SDV inubanan ni Reberendo John Patrick Pelonio.

Ang collect kon opening prayer miingon, “Amahan nga anaa sa mga langit, ilhon unta namo nga Dios ang imong bugtong anak, bisan diha sa kaubos diha sa iyang kinaiya nga tawhanon, ug simbahon namo ang Sto. Niño nga among Ginoo nga gamhanan bisan diha sa kahuyang sa iyang pagkabata. Himua nga magsunod kami kaniya sa matinud-anon nga kasingkasing, tabangi kami sa pagdawat uban sa kahinangop sa usa ka bata sa iyang gingharian dinhi kanamo ug sa pagdangat sa ganti nga gisaad alang sa mga mapaubsanon.”

Subay sa pag-ampo gipahinumdoman dili lamang ang mga lumulupyo sa Lanzona kondili ang tanan nga nakakita diha sa live streaming pinaagi sa DXGN 89.9 Spirit FM ang paghatag sa tibuok nga pagsalig sa kaayo sa Dios diha sa pagtuman sa iyang saad sa luna sa iyang gingharian sa langit.