PUNO nga kasaulogan

Ang ika-41 nga kasaulogan sa piyesta sa Parokya sa San Pablo giablihan pinaagi sa PANAGSUD-ONG niadtong Enero 15, 2024 diin nagkatapok ang tanang myembro sa 13 ka sona nga gilangkuban sa 59 ka katilingban, center organizations ug mga ministriya nga kabahin sa Parokya. Gisugdan ang PANAGSUD-ONG pinaagi sa pag-ampo nga gipanguluhan sa Padre Kura nga mao si Reberendo Padre Allan Rodriguez, ug gisundan sa pagpaambit sa pagdagkot sa mga sulo kauban ang 13 ka zone coordinators ug mga center organization heads and ministry heads isip simbolo sa kahayag sa mga katilingban ug pondok nga girepresentar sa mga llideres nga maoy nakapadugang sa pagdilaab sa kalayo sa pagtoo isip usa ka simbahan sa Dios. Dugang usab sa nakabibo sa maong pag-abli ang mga banners ug flaglets nga dala sa mga miyembro.

Human sa maong kasaulogan gipahigayon usab niadtong Enero 20, 2024 human sa Misa Nobena ang PAUGNAT o FITNESS DAY diin adunay gitagana nga Zumba. Sa samang adlaw usab sa alas 9 sa buntag gipahigayon ang Kasalan sa Parokya nga adunay 27 ka paresan nga gikasal. Pagka Enero 21, 2024 adlawng Dominggo gipahigayon ang PASUNDAYAG diin gipakita sa mga miyembro, parokyano ug mga organisasyon ang nagkadaiyang talento sa maong kasaulogan diin adunay mikanta, misayaw, midrama ug nagpasiaw aron lamang kahatagan ang katawhan og lingaw ug maanindot nga mga presentasyon nga gipangandaman gayud. Gipahigayon usab niing adlawa ang awarding sa certificate of participation sa tanan nga miambit ug nakigduyog sa maong kasaulogan.

Enero 24, 2024 bisperas sa kapistahan gipahigayon ang prosesyon duol sa palibot sa parokya ug misunod gilayon ang Santos mga Misa. Enero 25, 2024 adlaw sa kapistahan ug ang Santos nga Misa nga gipahigayon gipanguluhan sa Padre Kura, inubanan sa resident deacon nga si Reberendo John Patrick Pelonio ang alas 6 sa buntag nga Misa, ug sa alas 9 nga misa diin gi cover sa DXGN 89.9 Spirit FM-Davao nga gipanguluhan ni Reberendo Monsenyor Paul Cuison inubanan usab ni Reberendo Padre Dexter Veloso, Reberendo Padre Anthony Sepulveda sa Opus Dei community ug upat ka mga diyakono.

Gipaambit ni Monsenyor Paul diha sa iyang wali ang kaanindot sa kinabuhi sa pagkakabig ni San Pablo gikan pagka-maglulutos sa mga sumusunod ni Kristo ngadto sa iyang pagkahimong sumusunod ug nahimong apostol sa Ginoo, Gisaysay usab niya sa iyang pagpapamalandong nga gamhanan gayud ang grasya sa Ginoo labi na og muabot kanato. Gipasabot usab niya nga ang conversion dili overnight kondili inanay nga pagkausab o gitawag niya nga an ongoing process. “Conversion is a constant struggle, a day to day experience nga ang tawag mao ang pag commit sa maong proseso sa pag usab sa atong kaugalingon” dugang pa niya.

Gipanguluhan usab ni Reberendo Padre Ritsche Gamaya ang alas 12 nga misa sa maong kapistahan. Ang mga GSL’s and organization members nagkatapok sa ground sa parokya ug nagsalo-salo sulod sa ilang nagkadaiyang mga tents, uban sa kalingawan nga gihatag ug gipanguluhan sa San Pablo Youth Apostolate diin adunay mga makalingaw nga mga dula alang sa mga hamtong ug kabataan. Aduna usab live band nga gidalit alang sa katawhan nga miharana ug nagpasayaw sa atong mga kahamtungan human sa paniudto.

Gipahigayon usab ang basketball sa mga kaparian kontra sa mga selected member sa mga nag-alagad sa parokya. Human sa maong dula gipahigayon na ang religious night diin gitambungan sa mga nagkadaiyang relihiyosong pundok nga anaa nahisakop sa maong parokya.

Ginapaabot sa mga kaprian, diyakono, staff, volunteers, PPC, SoCCom and San Pablo Youth Apostolate ang dakong pasalamat sa mga miambit, nakisadya ug mitabang aron mamahimong madasigon, mabungahon ug malipayon ang ika-41 nga kapistahan sa maong parokya. (Brian Origenes)