Kahiusahan sa Kabuhatan

Usa sa mga maayong nabuhat sa teknolohiya mao ang pagpahiduol sa matag-usa. Ang kaniadto nga daw layo kaayo karon pinaagi sa bag-ong imbensyon nahimong duol. Ang panagtagbo sa mga Diocesan Clergy of Mindanao nahimong posible nga daw kaniadto imposible nga mahitabo. Ang ika-46 nga paghigayon sa DCM nga nahitabo sa Diocese of Marbel adunay tema “DCM: Walking together with hope in the path of integral ecology.”

Ang pag-abiabi sa mga kaparian nga nag-gikan sa mga nagkalain-laing lugar sa Mindanao gisugdan diha sa Santos nga Misa nga gipangulohan sa Obispo sa Marbel nga mao si Most Rev. Cerilo Casicas D.D. Sa iyang homiliya iyang gipamalandungan ang ebanghelyo ni San Markos nga naghisgot mahitungod sa pag-ayo sa daghang mga masakiton nga buot sila makagunit sa sidsid sa saput sa atong Ginoo. Sila nga mga tawo nga natandog sa gihimo sa atong Ginoo nahimong kabahin sa pagpadayag sa gahum sa Dios: ang pagpadayag sa makaluwas nga gahum sa atong Ginoo. Sa iyang hagit sa tanan nga mga kaparian siya miingon, “kita nga natandog sa presensya sa Dios diha kanato mahimong kahigayonan aron ikapadayag ang presensya sa Dios ngadto sa uban.”

Ang pahinumdom ni Bishop Casicas nga ang tanan adunay kalambigitan sa tanang kabuhatan, dili lamang kanato nga mga tawo apan sa tanan. Kining maong hagit nagpadayon gihapon hangtod karon. Ang problema sa atong kabuhatan, sa atong mga nasinati nga pagbaha, pagguho sa yuta, kini ang epekto sa wala nato pag-atiman og ayo sa atong kabuhatan.

Si Fr. Reynaldo Raluto nagpadayag sa iyang kabalaka kung magpadayon ang atong pag-abuso sa kabuhatan ug wala kitay pagpakabana nan, muhatod gayod kini sa padayonon nga pagkaguba sa kinaiyahan. Ang atong kinaiyahan naghatag kanato og negative feedback. Kini mao ang resulta tungod sa atong padayon nga pagguba sa kanaiyahan.

Ang dili nato pagpakabana sa kinaiyahan muhatod gayod kanato sa kaalautan.

Sa katapusan, kon maghisgot kita ug kalambuan (development) kini ma-equate ngadto sa hayahay nga kinabuhi, datu nga mga katawhan, taas nga mga building. Kon ato gayod lantawon kon unsa ang kalambuan kini aduna gayo’y masakripisyo. Ang pagsakripisyo diha sa kinaiyahan. Ang pagmina sa mga minirals sa kinaiyahan aron magamit diha sa purpose nga kalambuan. Apan ang epekto niini dayag gayod kaayo diha kanato karon.

Ang atong paningkamot diha sa kalambuan nahimong kadaot diha sa atong taliwala. Mopadayon kita sa pagpamalandong niini. Ang panagtagbo sa mga kaparian sa Mindanao mahimong kahigayonan aron sa pagmaigmat ug padayonon nga pagtubag sa kanunay nga hagit nga mao ang paghiusa kanato sa kabuhatan. Kita nga natandog sa presensya sa Dios diha sa atong taliwala mamahimong makatandog usab sa uban natong kaigsoonan pinaagi sa atong mga buhat. (Rev. Soren Abellanosa)