Viva Señor Sto. Niño! Viva Pit Señor!!!

Ang kapistahan sa Sto. Niño usa ka relihiyoso ug dako nga selebrasyon sa Pilipinas. Ang Espanyol nga titulo nga “Sto. Niño” nagpasabut nga “Balaan nga Bata”. Ang mga Pilipino adunay lig-on nga debosyon sa Balaang Bata nga makita pinaagi sa presensya sa Sto Niño. Ang adlaw sa kapistahan ginasaulog matag ikatulo nga Dominggo sa Enero (o ang ikaduhang Dominggo pagkahuman sa Solemnidad sa Epipanya). Ang mga singgit sa “Viva Señor Santo Niño” ug “Viva Pit Señor” milanog sa tibuok nasod samtang ang mga lungsod ug siyudad nagsaulog sa adlaw sa kapistahan.

Ang “Viva” susama nga ekspresyon sa “ulan nga yelo” ug sa literal nagkahulogang “pagkinabuhi”. Gigamit kini isip usa ka mailpayong paagi sa pagpasidungog sa Ginoong Jesus. Ang “Señor” kay Kinatsila nga pulong para sa “Ginoo”. Ang titulo gihatag sa pagpasidungog sa Batang Jesus isip pag-ila sa iyang pagka-Dios ug awtoridad sa tanan. Ang pulong nga “Pit” kay usa ka contraction sa Cebuano nga pulong nga “sangpit” nga walay eksaktong hubad sa Filipino o English.

Unang buwan sa tuig mao ang buwan sa Batang Jesus. Usa kini sa mga ginapangandaman nga pista tungod ang mga Pinoy naay dakong gugma sa Batang Jesus. Mao nga malampusong gisaulog ang ika-49 ka tuig nga kapistahan ni Sr. Santo Niño nga maoy patron sa Gagmay’ng Kristohanong Katilingban (GKK) sa Upper Ilang, Zone-12A nga nahisakop sa St. Francis Xavier Parish, Tibungco. Ang tema sa kasaulogan sa kapistahan niining tuiga nagkanayon: Santo Niño, Batang Jesus, Batobalani sa gugma sa Sinodong Simbahan. Ang Misa gipanguluhan sa ilang kura paroko, Rev. Fr. Proceso “Jun” Gimeno sa alas 9:00 sa buntag. Usab, sa pagsaulog sa ika-49 nga kapistahan gitukas ni Fr. Jun Gimeno ug Paul Gastanes ang ilang labing mahinungdanon nga plano sa pagpangandam sa ika-50 Golden Fiesta karong umaabot nga 2025. Ang ilang plano mao ang pagbag-o sa altar ug santuwaryo sa ilahang GKK.

Gisugdan ang dakong kasaulugan pinaagi sa enthronement and devotion sa batang Jesus. Mao kini ang pagsaysay sa kasaysayan sa pag-abot sa debosyon sa Sto.Niño sa Pilipinas ug paghuman sa pagsaysay, gikanta sa katilingban ang gozos ni Sto. Niño mao ang Batobalani sa Gugma, sa daang tawo palangga. Kanamo Malooy ka unta nga kanimo nangilaba. Niining pagkanta sa gozos, gipangtaas sa mga deboto ang ilang kamot ug nangamuyo sa batang Jesus ug niining tungura gi- enthrone ang Sto. Niño sa altar sa katilingban.

Ang pagkahimugso sa batang Jesus dinhi sa kalibutan nagdala ug paglaum ug kaluwasan sa matag usa kanato ug pinaagi niini kita gipahinumduman sa pagka mapaubsanon ug pagkamasinugtanon. Nga sama sa batang Jesus, kita mahimong mapaubsanon ug dili gayud magpasigarbo kung unsa man ang mga bahandi nga anaa sa atong kinabuhi. Kining mga butanga dili gayud importante sa mata sa Ginoo, ang pagserbisyo, pagpangalagad ug pagtabang sa uban maoy mas importanteng butang nga angay natong buhaton. Ang pagkamapaubsanon maoy pinakaunang lakang sa pagsunod sa dalan ni Kristo ug sama sa batang Jesus kita pud usab angay nga magmasinugtanon sa misyon nga gihatag sa Ginoo kanato.

Niining tuiga, midoble ang pagdagsa sa mga deboto sa kapilya sa Sto. Niño Upper Ilang tungod gusto nila bisatahon ug makita ang kaanyag sa restored image sa Sto. Niño nga nahimutang sa tuo nga bahin sa kapilya. Ginatuohan nga kining imahe, naa nay pangidaron o sa ato pa, antique na kini ug milagroso. Daghang mga deboto nga nagahikap niini tungod nagapangamuyo sila sa balaang bata nga tagaan sila ug maayong panglawas, ilayo sila sa katalagman ug protektahan ug gabayan ang matag pamilya.

Angay gayod kita musimba ug magpasalamat sa Dios sa tanang grasya nga atong nadawat ug mag-ampo sa Batang Jesus nga panalipdan unta kita niya sa mga katalagman. Niining kapistahan sa Diosnong Bata, kita gipahinumduman ni Kristo sa pagpabilin nga masaligon sa panabang sa Dios Amahan, mapaubsanon, masinabtanon ug mapasayloon sa isigkaingon.

Gihuman ang maong kasaulogan sa Santos nga Misa sa usa ka Traditional Sinulog Dance nga gipangandaman sa GKK Sto. Niño Youth Apostolate.

Viva Señor Santo Niño! Viva Pit Senyor! (Paul Gastanes)