Bulahan ang matag pamilya

Nahimong mabolokon ang pagsaulog sa ika-19 ng kapistahan sa Parokya sa Sagrada Pamilya sa Barangay Dumoy ug Baliok. Ang maong selebrasyon gisugdan pinaagi sa Misa sa alas 6:00 sa buntag ug gisundan sa motorcade sa mga patron sa GKK nga nahisakop sa parokya. Pagkahuman sa motorcade gisunod gilayon ang pagtimbaya sa matag sona nga anaa nagpundo sa matag booth nga ilang giandam. Nagpa ila-ila ang matag sona pinagi sa yells & cheers nga nakadugang sa kasadya sa maong okasyon. Sadya usab ang padula ug mga presentasyon nga gidumala nila Bro. Ian Sarroza, Parish PSL Coordinator inubanan ni Jesse Marc Junawid, Parish Youth Coordinator. Nahuman ang tunga sa adlaw nga aktibidad pinaagi sa paniudto nga giambitan sa mga parokyano.

Human sa paniudto, gipahigayon ang paugnat sa kusog sama sa baskeball ug volleyball.

Pagkaugma, Disyembre 31 sa alas 8:30 sa buntag, gipahigayon ang Misa nga gipangulohan ni Arsobispo Romulo Valles, DD. Sa iyang homiliya, iyang gihatagan ug gibug-aton ang importanteng tahas sa mga ginikanan nga dili lamang igo sa pagpakaon ug pagpaeskwela apan labaw sa tanan makabaton ug maayong pamatasan ug hiyas sama sa banay ni Maria ug Jose. Iya usab nga gihagit nga ang matag pamilya nga makasulod sa balay sa Sagrada Pamilya didto sa langit.
Paghuman sa matag misa nianang adlawa, giaghawag ang mga nanimba alang sa salu-salo.

Dako kaayo ang kalipay ni Engr. Gina Capuno, ang PSK Parish Coordinator sa malampuson nga pagsaulog sa kapistahan sa parokya. Nagpasalamat usab siya sa makanunayong suporta ni Fr. Roger D. Duhaylungsod, ang kura-paroko.
Sa katapusan iyang gipadayag ang iyang kinasing-kasing nga pagpasalamat sa tanang mga parokyano labi na gayod ang mga GKK Servant Leaders nga misalmot sa mga kalihukan. (Flor Arellano – Deloria | HFP Parish SoCCom)