Puno Nga Pista

Disyembre 8, 2023, sa takna sa alas 4:30 sa kaadlawon milanog ang banda alang sa diana nga namukaw sa mga katawhan atol sa pagsugat sa ika-45 ka tuig nga kapistahan sa among mahal nga patron Immaculada Concepcion-Cabonbon uban sa Tema “Santa Maria, Sumbanan sa Tiunay nga Pagkapiniyalan sa diwa sa Komunyon, Partisipasyon ug Misyon.”

Alas 9:00 ang takna sa buntag, gisugdan ang Santos nga Misa nga gipanguluhan sa among parish administrator dinhi sa San Roque Parish-Malabog nga si Rev. Fr. Cirilo O. Bermudez inubanan ni Rev. Angelo Espinas. Sa kinasing-kasing gidayeg sa among parish administrator kay sa unang adlaw pa lang sa novena mass daghan na ang miapil sa Santos nga Misa. Mapasalamaton kaayo siya kay sa adlaw sa fiesta midoble, mitriple na ang gidaghanon. Sa iyang homiliya siya miingon,”Ang pagdebosyon natong mga Katoliko sa atong Mahal nga Inahan nga si Santa Maria, angayan nato nga duolan, makatabang gayud kanato, dili gyud kita magmahay, Sa unsang paagi? Ilabina sa atong away batok sa demonyo.”

Sulod sa Santos nga Misa gihimo usab ang panalangin o Act of Consecration sa putli nga kasingkasing ni Maria.

Alang sa mensahe pasalamat sa among PSK nga si Mr. Dominador Juaton, mapasalamaton kaayo siya sa tanang kooperasyon aron mahimong malampuson ang kapistahan. Matod pa niya, “Lahi napod nga pultahan ang miabli sa atong kalampusan nga mahimong salamin nga atong makit-an og masinati ang pagkatiunay nga pagkapiniyalan, dili ta magpakawala sa paglaum bisan pa man og unsa ang atong dangatan gumikan kay ang atong pagpadayon sa atong gimbuhaton kabahin kana sa atong misyon, gani dili lalim ang misyon sa haring adlaw dinhi sa kalibutan, sidlak sa kabuntagon, padulong sa kaudtohon apan sa iyang pagbaktas ngadto sa kahaponon adunay naglugitom nga mga dag-om misakmit sa iyang kahayag ug kadulom mahimong naghatod sa mangitngit ug mangiob nga kagabhion.”

Adunay 9 ka mga bata ang nakadawat sa Sakramento sa Bunyag. Alas 11:00 nahuman ang Santos nga Misa, malipayon ug sadya nga naniudto ang tanan, gisugat na usab kami og banda gipresentar sa mga kabataan sa Cabonbon National High School ug naghimo sila og parada gikan sa simbahan padulong sa Cabonbon Gym.

Ala 1:00 ang takna sa hapon adunay programa ug pasundayag nga gihimo sama sa GSL’s basketball game, inter-unit basketball game, mga parlor games, presentasyon sa mga senior citizens ug sa katapusan ang amateur singing contest sa mga kabataan. Nahimong nagmalampuson ang tanan pinaagi sa tabang og suporta sa Sitio officials ug sa mga pangulo sa GKK.

Puno sa kalipay, Puno sa kadasig, Puno sa Pagpasalamat, Puno sa Gugma…

Happy Fiesta! VIVA SANTA MARIA!

(Noralyn Largo)