Pakig-alayon alang sa Seguridad

Atol sa pagpangandam sa atong mga kura paroko alang sa umaabot nga mga Misa de Gallo, gisulod sa hilisgutanan sa Presbyterium Meeting ang seguredad sa mga parokya labi pa nga bag-ohay lang dunay hulga sa seguredad didto sa Marawi.

Tibuok pwersa nga mitambong sa Presbyterium Meeting ang mga hepe sa nagkadaiyang estasyon sa polisya dinhi sa dakbayan sa Davao alang sa pagpakig-alayon sa mga kura paroko alang sa seguridad sa mga sibilyan.

Dunay tulo ka mga personahe ang naghisgot sa mga plano sa seguridad alang sa Pasko Fiesta. Pinangulohan ni Davao Task Force Commander Col. Darren Comia, gipaabot sa Safety and Security sa Davao nga luwas kita ug layo sa mga hulga sa seguridad. Subli pa ni Col. Comia, daan nang andam ang mga nakauniporme niini nga mga panghitabo apan kanunay silang nangandam pinaagi sa pagbansay.

Pipila sa mga pahinumdom nga gihatag ni Col. Comia alang sa mga sibilyan ang pakig-alayon sa mga check points labi na pasulod sa dakbayan. Ikaduha, ang dili pagdala sa mga dili kinahanglan sama sa mga dagkong bags o backpacks sulod sa simbahan atol sa mga Misa de Gallo. Kung mamahimo mga transparent water bottles usab ang gamiton aron dili harangon.

Dako ug pasalamat si Most Rev. Romulo Valles, DD. niini nga lakang sa atong mga kasundalohan ug mga kapulisan.

Nanghinaot ang tanan nga padayon kitang mag-igmat ug magbantay sa atong palibot alang sa atong seguridad.