Paglipay, ayaw kahadlok sa pagsunod

Niadtong Desyembre 7, 2023 gisaulog ang ika-35 nga kasumaran sa kapistahan sa Mahal nga Patron Immaculada Conception sa GKK ICC Langub Zone 4 nga sakop sa San Roque Parish-Malabog. Nagsugod ang Santos nga Misa sa 9:15 sa buntag nga gidumala sa among Parish Administrator, Rev. Fr. Cirilo O. Bermudez, uban sa tema: Santa Maria Sumbanan sa tiunay nga Pagkapiniyalan sa diwa sa Komunyon, Partisipasyon ug Misyon.

Sa iyang homiliya gisaysay niya ang pagbuntis ni Birhen Maria sa atong Mesiyas, mapasalamaton kita tungod niini atong naambitan ang pagkawala sa atong salang panulondon. Adunay 3 ka pulong nga iyang gipaambit. Ang unang pulong mao ang “pagmaya o paglipay”. Malipayon kita tungod kay kita buhi ug puno sa grasya ug gugma. Ika-duha “ayaw kahadlok Maria”, dili angayan nga mahadlok kita tungod ang Ginoo kanunay naga uban kanato pinaagi sa pagsalig ug pag-ampo sa rosaryo, kinaugalingong pag-ampo ug labaw sa tanan ang pagtambong sa Santos nga Misa kay kini mao ang pinakataas nga matang sa pag-ampo kay si Jesukristo uban kanato ug ato Siyang madawat diha sa Santos nga Eyukaristiya. Ang ika-tulo, ang pagsugot ni Maria o ang iyang pagsunod sa kabubut-on sa Ginoo, siya miingon “ania ang ulipon sa Ginoo matuman dinhi kanako sumala sa imong pulong.”

Ang mensahe sa PSK nga si Mr. Marcial B. Aparica naghatag sa pulong pasalamat sa tanan niyang mga miyembro alang sa ilang kooperasyon sa kalihukan sa ilang kapistahan, sa mga bisita, mga kaubanang pangulo sa Sona 4, sa mga Peace Builders nga mitabang sa pagtiles sa flooring sa GKK inubanan sa mga Unit leaders ug sa mga panday ug mason.

Viva Maria! Dalaygon ang Dios sa Kanunay!

(Arlene Tarnate and Angelita Sombilon | San Roque Parish-Malabog SocCom)