Kagikanan Sa Kadasig

Alang sa pagpalambo sa pagtoo ug pagseguro sa espiritwal nga kaayohan, ang parokya sa Inahan sa Kanunayng Panabang nga gipangulohan sa kura-paroko nga si Rev. Fr. Gary Alvarado CSsR, mainitong gidawat ang atong Arsobispo nga si Most Rev. Romulo G. Valles D.D. sulod sa tulo (3) ka adlaw nga bisita-pastoral kon Pastoral Visit nga miresulta sa malungtarong epekto sa Parokya ug mga myembro niadtong Nobyembre 23-25, 2023.

Nobyembre 23, unang adlaw sa pagbisita, gisugdan sa usa ka misa nga gisaulog sa atong Arsobispo sa Davao kauban si Msgr. Jaime Gamboa ug Rev. Fr. Gary Alvarado nga nagkahiusa sa pag-ampo ug pagpasalamat. Ang maong misa gipartisipahan sa tanang kaparian, mga layko ug mga GKK Servant Leaders(GSL) sa parokya. Human sa misa, gisunod ang panihapon kauban ang Redemptorist Community.

Sa ikaduhang adlaw sa pagbisita, ang Arsobispo mirepaso ug gipirmahan ang mga pinansyal nga dokumento ug mga kanonikal nga mga libro sa parokya nga nagpakita sa tulubagon ug pagkatinugyanan. Human sa panihapon, gisunod dayon ang tigum sa paghimo ug makahuluganong dayalogo ug report kauban ang Parish Councils, Parish Pastoral Council, Lay Organization and Mandated Associations, ug mga parish staff. Naghatag sab ang Arsobispo ug mga giveaways isip timaan sa pagbisita.

Sa katapusang adlaw sa pagbisita, giduaw ang duha ka GKK nga sakop sa parokya diin sila nagkinahanglan sa inspirasyon. Daku kaayo ang kalipay sa taga GKK Lopzcom ug GKK Bluepost kansang mga baguhang tinubo nga mga GKK sa pagbisita sa atong Arsobispo nga nakig-abiabi kanila ug naminaw sa sa ilang mga istorya sa kalipay ug kasakit nga nasinati sa ilang panaw sa pagtoo. Human sa pagbisita, gisaulog ang katapusang bahin sa Pastoral Visit, ang Santos nga Misa nga nahitabo sa sentro sa Parokya didto sa Sto. Rosario Gym diin ang GKK Sto.Rosario ang maong magdadapit sa misa. Usa sa naghatag ug kabibo, mao ang homiliya nga may dalang pasiaw sa Arsobispo. Human sa misa gisunod dayon ang paniudto kauban ang parish councils ug mga zone groups nga gilangkuban sa mga GKK Servant Leaders (GSL) ug mga myembro. Atol sa paniudto, gisulod ang mubong programa ug mga piktoryal.

Kining bisita-pastoral mao ang obligasyon sa atong Arsobispo diin iyang gipaningkamotan sa pagpamulso sa nagkalain-lain og nagkadaiyang parokya sa tibook simbahan sa Davao. Ug kini sad ang pagpalig-on sa pasalig sa parokya sa pagtoo ug paghiusa, nga maghatag ug kagikan sa kusog ug kahupayan sa mga myembro panahon sa kalisod. (Mary Grace Gonzales – OMPH Parish/GKK SoCCom)