Dili Sayon

Ang pagbag-o sa Liturhiyanhong Tuig B, timailhan sa Panahon sa Adbiyento. Maabtikon ang mga parokyano sa St. Mary of the Perpetual Rosary Parish sa pagtambong sa usa ka Advent Recollection niadtong Desyembre 5, 2023, adlawng Martes sa alas 6:30 sa gabii inubanan ni Rev. Julius Lugay, ang diyakono sa parokya.

Ang pagpaambit ug pagpadayag ni Rev. Julius diha sa mga kalisdanan ug mga pagsulay nga iyang nahiaguman sa wala pa siya nahimong diyakono nakapatandog sa tanan. Siya nag-ingon, “dili sayon ang pagsunod kang Kristo, daghang tunok ang agian mo.” Gidawat niya kining tanan tungod siya mitoo nga siya magmalig-on diha sa atong Ginoo.

Adunay hamubo nga pagpadayag kabahin sa gipamalandongan nga kahulugan sa matag letra sa ADVENT: Anticipation, [in the coming of the] Divine, Victory, Enlightenment, Nurturing, Transformation. Dinhi nasabtan ang pagkamahinungdanon sa panahon sa Adbiyento nga kitang tanan nangandam sa ikaduhang pagbalik sa atong Ginoo.

Nahisgutan usab ni Rev. Julius, ang “kenosis” nga kung sa English, Self-emptying nga mao ang katapusang pagpadayag sa atong Ginoong Jesus. Ang pagpaambit sa mamumulong nakapadugang sa among kalambuan ug hugot nga pagtoo isip mga alagad sa Dios.

Mapasalamaton ang mga Parokyano nga nanambong sa maong Advent Recollection ilabina ang nahisakop sa Zona 5,6,7,10 sa panahon ug talento nga gigahin ni Rev. Julius ug sa among Kura Paroko, Rev. Fr. Dionisio Tabiliran nga maabtikon ug madasigon sa pagpaambit ug sa iyang makanunayong supporta. Dalaygon ang Dios sa Kahimayaan! (Maria Dexie Calvo, GKK SoCCom)