Pagtukaw nga Malaumon ug Matuohon

Unang Domingo sa Adbiyento (December 3, 2023)
Is 63:16b-17, 19b, 64:2-7 / Ps 80:2-3, 15-16, 18-19 / 1 Cor 1:3-9 / Mk 13:33-37

A ng panahon sa Adbiyento usa ka pag-andam sa pag-abot sa atong Ginoo. Kini gayod ang sagad natong madunggan kon maghisgot kita kon unsa ang Adbiyento. Apan kon ato gayod kining tan-awon diha sa espirituhanon nga panaw sa atong kinabuhi kini usa ka pag-andam sa atong tagsa-tagsa ka kaugalingon sa pagdawat sa Dios. Ang Dios maoy maghari diha sa atong kinabuhi nga makita diha sa atong mga pulong og mga buhat. Ang Dios gayod ang makita diha sa atong kinabuhi ug dili ang atong tagsa-tagsa ka mga samad nga atong nasinati diha sa inadlaw-adlaw nga pagkinabuhi.

Ang imbitasyon sa Ginoo mao nga kita kanunay mag-andam sa atong kaugalingon kay wala kita masayod sa takna kanus-a si Cristo moabot diha sa atong taliwala. Apan kining maong imbitasyon sa Ginoo kanunay nagsukad diha sa atong kaugalingon aron nga kita puno sa paglaum dili kita kapuyan sa pagpaabot kaniya. Makalahutay kita sa bisan unsang mga hagit nga atong maagian sa atong kinabuhi.

Ang kangitngit diha sa kagabhion sa dihang natawo ang atong Ginoo diha sa pasungan kini nagtimaan sa kangitngit sa atong kinabuhi tungod sa sala. Ang sala nga maoy hinungdan nganong dili kita makasubay og tarong sa dalan nga gustong ipasubay sa Dios kanato. Nagkinahanglan kita sa kahayag ni Cristo ug kinahanglan nga matawo siya diha sa atong kinabuhi aron kita madan-agan sa iyang kahayag ug ang kangitngit sa atong kinabuhi madan-agan sa kahayag nga walay pagkapalong nga mao ang atong Ginoong Jesucristo.

Ang kanunay andam nga kaugalingon nagtimaan nga ang atong mga mata kanunay nga nagalantaw ngadto Kaniya. Kinahanglan makaila kita kaniya kay basin diha sa atong kinabuhi atong gikasugat ang Ginoo apan wala kita makamatikod tungod sa kadaghan sa atong giatiman nga mga kalibutanong mga butang ug wala nato siya mahatagi ug hustong pagtagad. Atong ilhon pag-ayo ang Dios aron bisan unsay mahitabo kita makaila kaniya diha sa kinatibuk-an gayod.

Sa katapusan, atong ablihan ang atong kaugalingon ug atong pamati-on ug sinati-on ang presensiya sa Dios diha sa atong kinabuhi. Ang pag-andam sa kaugalingon nagkinahanglan og pagtalikod sa sala ug atong isul-ob si Jesus nga maoy naghatag sa matuod nga kahayag nga mag-iwag sa atong mangitngit nga dalan. Niining panahon sa Adbiyento atong andamon ang atong kaugalingon nga puno sa paglaum ug atong lantawon ang moabot nga panahon diha sa mga mata sa pagtuo. Sa laktod nga pagkasulti, atong isalig ang atong panaw sa kinabuhi diha sa mga kamot sa Dios nga maoy tinubdan sa tanan. (Rev. Soren Abellanosa)