Makasasala Ko

“…unworthy of this precious gift, nga makit-an nako sa akoang kaugalingon nga makasasala ko, but God never gives up on me.”

Pipila ka mga pulong sa tataw nga pagkamapasalamaton ni Rev. Ritzchild John S. Cariaga niadtong Septembre 8, adlawng Byernes sa Parokya sa San Pablo sa iyang pinakaunang homiliya sulod sa Santos nga Misa isip pasalamat sa bag-ong orden sa pagkadiyakono nga iyang nadawat niadtong adlawa. Siya gitahasan na niining dako nga responsibilidad isip piniyalan sa katilingban.

Sa dagan sa iyang pamalandong siya mipaambit nga pipila ka higayon na sab siyang nakahuna-huna nga undangon ang iyang pormasyon, apan ang Dios balik-balik nga nagatawag kaniya nga madasig sa pagpadayon.

Tingali ang iyang mga ginikanan wala gayud maglaom sa iyang pagpadayon tungod miabot sab sa halos kinse ka tuig una siya na-ordinahan sa pagka diyakono. Ang atong mga ginikanan naghandom gayod sa maayong kinabuhi alang kanatong tanan apan sila usab anaa lang kutob sa paggiya ug pagimpluwensya sa mga anak pinaagi sa pagkinabuhi subay sa mga gitudlo ni Jesus. Gawas pa niini, ang pagpakita sa suporta sa mga damgo sa mga anak, dili sayon labi pa kung ang napiling kinabuhi kadtong nagkinahanglan sa paghalad sa kaugalingon ngadto sa katawhan.

Luyo sa kalipay ug kahinam nga nabati ni Rev. Ritzchild tungod sa grasya nga iyang nadawat, siya usab dunay gamayng kabalaka tungod sa dakong responsibilidad nga mamahimong ehemplo isip relihiyoso. Tuod man ang atong mga kaparian, mga ehemplo sa katawhan sa langit.

Pagkanindot pamarisan, ang hiyas sa pagpaubos nga ato gayong makita diha sa pagkamapasalamaton ni Reberendo Ritzchild. Matod pa sa panultihon, ang pagkamapasalamaton susi sa pagkamalipayon.

Duyogan nato si Reberendo sa iyang bag-ong tahas ug sa pagpadayon niya sa iyang pormasyon ug misyon sa pagpalapnag sa Maayong Balita, pinaagi sa atong mga pag-ampo. Hinaot nga kita mahimong sama kaniya, kanunay nga mapasalamaton.