Maayong Magbalantay: Alagad nga Pangulo

Solemnidad sa Kristong Hari (November 26, 2023)
Ez 14:11-12, 15-17 / Ps 23:1-2, 2-3, 5-6 / 1 Cor 15:20-26, 28 / Mt 25:31-46

Sa atong nadunggan sa kasaysayan o makita pa gani nato karon ug madungog sa pipila ka bahin sa kalibutan, ang mga giila nga “hari” usa ka dominanteng politikanhong tawo, maoy nagakontrol sa ilang ginsakpan, ug maila nga diktador. Kini usa ka hulagway sa usa ka hataas ug gamhanang Hari – usa ka maghuhukom nga naglingkod sa Iyang harianong trono ug kinsa gialagaran sa kadaghanan. Apan sukwahi kini sa kinaiya ni Jesus kinsa mao ang Hari sa mga hari.

Niining Solemnidad sa Cristong Hari, gihulagway ni Jesus kanato ang Iyang pagkahari isip Magbalantay ug Alagad nga Pangulo. Sa unsang paagi mahimo kini? Hari ba gayod Siya kon Siya mosulti kanato nga Siya mianhi dili aron alagaran kondili aron moalagad? Iyang gihugasan ang mga tiil sa Iyang mga disipulo, ang papel sa usa ka sulugoon; Siya nag-atiman kanato sama sa usa ka Maayong Magbalantay nga nag-atiman sa Iyang mga karnero; ug Siya andam nga mobiya sa 99 aron sa pagpangita sa usa nga nahisalaag. Salamat sa Diyos nga ang atong Hari usa ka Maayong Magbalantay ug Alagad nga Pagulo. Ang atong Ebanghelyo nagpahayag niini sa yano nga paagi: Kita pagahukman pinaagi sa atong pagtratar sa uban – kon giunsa nato pag-atiman ang labing ubos sa atong mga kaigsuonan, kon giunsa nato pagsunod ang panig-ingnan ni Jesus nga atong Maayong Magbalantay ug Alagad nga Pangulo. Kini mao si Cristo nga Atong Hari!

Ug sa unsang paagi si Cristo mahimong Hari sa atong kinabuhi? Imbis nga mosulay kita sa pagkontrolar sa uban, hinuon pasulabihon nato ang pagserbisyo kanila ug pag-ampo alang kanila sama sa Maayong Magbalantay. Mahimo natong abi-abihon pagbalik kadtong nahisalaag; pakan-on ang mga gigutom; bistihan ang mga hubo; atimanon ang mga masakiton; bisitahon ang mga binilanggo; ug hatagan og tubig ang mga giuhaw; ug uban pang mga buhat sa kalooy.

Dili gayud nato tugotan ang kalibutan sa pagkumbinser sa katawhan nga ang gagmay nga mga buhat sa sakripisyo, sama sa pagserbisyo ug pagkamabination dili na importante. Sa pagkatinuod, kini mahinungdanon kaayo! Ug si Jesucristo nga atong Hari nagpahinumdom kanato: Sa matag higayon nga buhaton ninyo kining mga butanga alang sa labing ubos, gibuhat usab ninyo kini alang Kanako! Nan, ang atong pagbuhat niining ginagmay ug daw walay hinungdan nga mga buhat, kita nagtabang sa pagtukod sa Gingharian sa Dios dinhi sa yuta!

Mag-ampo kita alang sa pag-abot sa maong gingharian sama sa gitudlo ni Jesus kanato sa Amahan Namo: Umabot ang Imong Gingharian! Ug kini moabut lamang kon kita mopasalig sa pagtukod niini dinhi sa yuta sa walay paglangan. Busa karong adlawa, atong hinumdoman si Cristo nga atong Hari nga mao ang Maayong Magbalantay ug atong Alagad nga Pangulo. Atong hinumduman nga ang katapusan nga paghukom pagahimuon pinaagi sa pagsuta kon giunsa nato pagkinabuhi sa bulawanong lagda: Buhata ngadto sa uban ang buot nimong pagabuhaton kanimo. Atong himoon nga si Jesus, mao ang Ginoo sa atong mga kinabuhi, ang Hari sa atong mga kasingkasing, hunahuna ug mga buhat! (Rev. Junel Bustamante)