Kapistahan Setenta Y Singko sa Santo Rosario

“Dali na kamo mga kaigsoonan, dali nganhi sa Santo Rosario,” usa ka maanindot ug madasigon nga entrance song agi ug pag-awhag sa tanan nga katawhan nga mitambong alang sa pasaulog sa kapistahan sa Patron.

Gisaulog ang kapistahan sa Santo Rosario sa Toril sa matag Oktubre syete ug karong tuiga mao ang ika–setenta y singko sa pagsaulog niini. Ang mga Nobena gisugdan atong Septembre 28, human sa Nobena mosunod dayon ang Santos nga Misa.

Sa bisperas sa pyesta, Oktubre 6, gihimo ang motorcade o opening salvo nga giduyogan sa nagkadaiyang ahensya, institusyon , eskwelahan ug uban pa nga nahisakop sa Parokya sa Sto Rosario. Sa hapon mao usab ang pagprosesyon sa Mahal nga Birhen Maria uban sa nagkalain-laing Patron sa 98 ka mga GKK nga nahisakop sa parokya. Bisan sa kainit sa panahon niduyog gayud sila sa mga bulohaton isip mga piniyalan sa atong Ginoo.

Sa dili pa magsugod ang prosesyon, gihimo ang panalangin ug pagbendisyon sa mga patron. Matag patron nagsunod ang membro sa GKK uban sa kadasig sa pag-ampo sa santos nga rosaryo.

Alas 8 sa buntag ang misa sa pagsaulog sa kapistahan nga gipangulohan sa mahal nga Obispo, Most Rev. Romulo Valles, D.D. inabagan sa mga pari nga sila si si Rev. Fr. Victor Isidoro Gilay, kura paroko, Rev. Fr. Efren Guban Jr., ug Rev. Fr. Danilo Dotollo ug ang mga imbitadong mga pari nga miduyog sa pagsaulog sa Eukaristiya alang sa kapistahan. Anaa usab ang kanhing kura paroko sa maong parokya nga si Rev Fr. Dionisio Tabiliran.

Adunay pag pang-apodapod og food packs human sa kasaulogan panahon sa pagpaniudto.

Sa hapon mao ang presentasyon sa mga GSL nga nahisakop sa nagkadaiyang GKK. Dinhi makita ang mga talento sa mga GSL nga madasigon ug malipayon sa pagduyog sa kapistahan. Adunay papremyo sa matag participante nga makadaog sa choral, folk dance , zumba ug ingon man ang sa sports nga volleyball for women ug basketball for men. Adunay parlor games, booth contest ug draw a rosary contest ug pa-raffle. Nagkadaiya ang pahalipay nga nadawat sa napili nga mananaug. Kining tanan gisuportahan sa among pinalanggang kura paroko nga si Fr. Vic Gilay.

Naghatag ug kasadya sa mga GSL ang pagdula ug exhibition basketball games sa mga kaparian nga nakigsangka sa mga GSL men. Mibundak ang dakong ulan, apan wala kini makababag aron mahatagan ug kalipay ang mga katilingban.

Sa among Mahal nga Patron, Viva Santa Maria!!! (Vita S. Benabese | SRP SocCom)