Dakong Hubileyo

Malipayong gisaulog sa mga parokyano sa San Pedro Calungsod ang ilang unang kapistahan isip usa ka parokya niadtong milabay nga Oktubre 21, 2023, human mipagula og circular letter si Most. Rev. Romulo G. Valles, D.D. alang sa pagdeklara niini isip usa na gayod ka parokya nga sakop sa atong Arkidayosis dinhi sa Dabaw. Usa kini ka dakong hubileyo sa tanang mga parokyano tungod sa dugay’ng panahon, natuman ra gayod ang ilang gipangandoy nga mahimong usa ka parokya tungod sa tanang distrito sa Dabaw ang Baguio District lamang ang walay parokya.

Kahinumdoman nga gi-deklara nga usa ka Quasi-Parish ang San Pedro Calungsod sa Baguio District kaniadtong Disyembre 2015 uban ni late Rev. Fr. Ricky T. Flores isip unang tigdumala niini.

Ang deklarasyon sa ilang pagka-himong parokya gisugdan sa Santos nga Misa nga gipangulohan sa atong labing talahurong Arsobispo sa Dabaw Most. Rev. Romulo G. Valles, D.D. ug sulod sa Santos nga Misa gihimo usab ang pag-instalar kang Rev. Fr. Elvie R. Bordios isip unang Kura-Paroko niini. Ug sa samang paagi, human sa Santos nga Misa gihimo usab ang pag ground-breaking sa luna kung asa pagatukuron ang simbahan.

Malipayon ug maabtikon usab nga gitambungan sa mga parokyano sa San Pedro Calungsod ang maong dakong selebrasyon tungod sa ilang dakong pagmahal sa Santos nga Eukaristiya ug sa maong pagtoo.

Pagkahuman sa tanang kasaulogan, malipayon nilang gisalo-salohan uban sa mga lideres ang paniudto nga gi-andam alang sa tanan.

Ang maong deklarasyon usa ka kabahin sa kasaysayan sa maong parokya ug hinaot sa umaabot pa nga mga katuigan magpabilin gihapon ang maong kainit sa gugma sa Santos nga Eukaristiya ug sa pagtoo nga gitudlo ni Jesuskristo kanatong tanan. (Christian Rosales | Parish SoCCom)