Bendisyon sa Estasyon

Mapasalamaton ang tanang naglangkob sa Davao Verbum Dei Media Foundation Inc. gikan sa mga staff hangtod sa mga miyembro sa board tungod sa mapadayunong pagsuporta sa katawhan sa DXGN 89.9 Spirit FM. Tungod niini nga kainit sa pagsuporta, natapos ug nabendisyonan na ang bag-ong mga studio ug dugang conference rooms niadtong Nobyembre 20, adlawng Lunes. Ang maong pagbendisyon gipangulohan sa atong halangdong arsobispo sa Dabaw, Most Rev. Romulo G. Valles, DD.

Espesyal gyud nga minglupad ang Executive Director of the Catholic Media Network nga si Fr. Francis Lucas nga usa sa mga pinakaunang nagpakita sa pagsuporta sa pagbalik sa atong estasyon pito ka tuig na ang milabay. Apil sab nga mianhi gikan sa Manila ang international manager sa Eternal Word Television Network nga usa sa pinakadako nga religious network sa tibuok kalibotan. Gitambongan sab kini sa pipila ka mga benefactors ug board members.

Dili makatoo ang kadaghanan sa kalamboan nga nakab-ot sa DXGN sulod sa pito ka tuig sugod sa iyang pagbalik misyon. Mapasigarbuhon nga miingon si Archbishop Valles nga wala gayud damha kini nga kalamboan sulod sa maong sibyaanan. Busa ingun-ana nalang kadako ang iyang pagpasalamat sa mga katawhan nga misalig ug mitoo sa mga katawhan nga nagpaluyo niini nga kadaogan. Magpadayon gihapon ang pag-alagad pinaagi sa pagsibya ug pagpalapnag sa maayong balita nga karon mas gihandom ang klarong transmisyon.

Matapos ang rito sa bendisyon, dunay gamayng salo-salo sa San Pablo Parish Marian Hall diin gipagaambitan ang mga pagkaon nga puno sa kalipay ug pagpasalamat.