Ang Sambingay bahin sa Tulo ka Sulugoon

Ika-33 nga Domingo sa Ordinaryong Panahon (November 19, 2023)
Prv 31:10-13, 19-20, 30-31 / Ps 128:1-2, 3, 4-5 / 1 Thes 5:1-6 / Mt 25:14-13

Ang Ebanghelyo niining semanaha mahitungod sa usa ka sambingay diin ang tulo ka mga trabahante gihatagan og lain-laing mga talento. Ang gihatagan ug lima ka talento sa agalon, mibalik nga may lima pa ka talento. Ang usa nga may duha ka talento, mibalik nga may duha pa. Apan ang may usa ka talento, iya kining gilubong sa yuta ug mibalik siya nga walay dala. Masabtan nato nga nasuko ang agalon, ug iya kining gi-ingnan ang maong sulugoon: “Kay ang kasaligan hatagan pa gayod aron modaghan pa ang gitugyan kaniya; apan ang dili kasaligan, bisan ang gamay nga gitugyan kaniya kuhaon pa.”

Ang pulong nga talento naggikan kini sa Latin nga pulong “talentum”, nga nagtumong sa suhol o kantidad sa salapi sa usa ka trabahante. Niini nga sambingay, atong makita ang agalon nga naghatag sa iyang tulo ka sulugoon og lain-laing kantidad sa salapi. Tungod sa kahadlok sa ikatulong sulugoon sa iyang agalon, iyang gilubong ang talento ug walay nakuhang balos. Ang tanan nga naa kanato ug ang mga naangkon nato sa atong kinabuhi gihatag kini sa Dios kanato. Ang atong mga talento, ingon nga atong talagsaon ug natural nga mga kahanas, gihatag kanato sa Dios, ug atong katungdanan isip iyang mga anak ang paggamit niini sa paghimaya kaniya. Bisan unsa pa ka daghan ang gihatag kanato, kita gitawag sa paggamit sa atong mga talento tungod sa atong gugma sa Dios ug sa atong mga silingan. Pag-abot sa panahon nga naparalisar kita tungod sa kahadlok, sama sa ikatulo nga sulugoon, kinahanglan natong tawagon ang gugma sa Ginoo aron atong mapadaghan ang mga gasa nga iyang gihatag kanato. Kanunay kitang gitawag sa pagpamalandong sa kinabuhi ni Kristo, ug dayag nga gihatag ni Hesus ang tanan niyang nabatonan, lakip ang iyang kaugalingong kinabuhi, alang niadtong iyang gihigugma. Kon muabot ang panahon nga magkalisud kita, ang larawan sa krus maoy usa ka butang nga atong pamalandungan kon kita nagkinahanglan sa kusog ug kagawasan gikan sa mga gapos sa kahadlok. Ang pag-antos ni Jesus sa krus mao ang hingpit nga ehemplo sa kanunay nga paghatag sa tanan nga naa kanato sa pag-alagad sa Dios ug sa atong mga silingan. (Bro. Ignatius Gonzales, CFA)