Ang nahinumdum, nahigugma

Ang pagsaulog sa kalag-kalag kabahin na sa tradisyon sa katawhan ilabi na sa mga katoliko. Kini gina saulog matag tuig isip paghinumdom ug paghatag pagtagad sa mga mahal sa kinabuhi nga mipanaw na niining kalibutana. Diha sa atong paghinumdom kanila, nag gahin kitag espesyal nga panahon alang sa paghalad ug mga pag-ampo ug pagpasalamat sa gasa sa kinabuhi nga ilang gipuy-an uban kanato kaniadtong buhi pa sila.

Diha sa maong kasaulogan matag tuig, kini naghatag og higayon usab sa mga pamilya nga magkatigom. Ug diha sa maong panagtigom mahisgutan ang mga kagahapon lakip na ang mga maayo ug dili maayo nga kasinatian uban ang hinigugma nga mipanaw na. Sa ato pa, ang atong kasinatian kaniadto uban ang mga mahal sa kinabuhi nga namatay na nagpahinumdom kanato nga kita nahigugma kanila ug tungod niini nga gugma naghandom kita nila. Nagalaom kita nga diha sa atong paghinumdom kanila, pinaagi sa atong paghalad ug mga pag-ampo, nakatabang kini kanila nga sila usab anaa na sa maayong luna.

Apan diha sa akong pagpamalandong, nakapangutana ako, “kas-a ra ba sa usa ka tuig ang akong paghatag pagtagad ug paghinumdom sa mga hinigugmang nangamatay na?” Kini nga pangutana naghagit kanako sa paghatag ug panahon ug higayon matag adlaw sa akong kinabuhi nga malakip kanunay sa akong mga pag-ampo ang mga mahal sa kinabuhi nga nangamatay na. Nanghinaot ako nga ang kasaulugan sa kalag-kalag dili lang magpahimnumdom kanako sa pag-ampo sa ilang mga kalag nianang adlawa o matag bulan sa Nobyembre apan sa pag-ampo kanila sa matag adlaw sa akong kinabuhi.

Sa katapusan, ang kasaulogan sa kalag-kalag naghatag ug mensahe alang kanatong tanan. Kini nga mensahe nag punting diha sa atong pagpamalandong sa kinabuhi, kamatayon, ug relasyon nato dinha sa mga mahal sa atong kinabuhi nga nangamatay na. Gipahinumdoman usab kita sa gugma nga atong gipadayag diha sa kanunay nato nga paghinumdom kanila. (Perry Neil Patayon)