Pili Na Sa Umaabot Nga Pinili-Ay, O Piniling Katawhan Sa Dios

“Mu botar ka karong umaabot nga eleksyon?” “Kinsa’y pili-on nimong kandidato?” “Aduna ba kaha’y madala nga kalambo-an ang akong botaran nga kandidato?” Mao kini ang kasagaran natong madungog nga mga pangutana karong panahona nga nagpahimangno kanato sa atong katungdanan isip lungsoranon – ang pagpili sa umaabot nga pinili-ay.

Isa sa mga batakang katungod sa usa ka tawo nga nahisakop sa usa ka nasud mao ang pagbotar. Kini usa ka konkretong pagpadayag sa atong kagawasan isip mga lungsoranon. Matod pa sa atong Inahang Simbahan, ang pagbotar kabahin sa pag-apil sa pampublikong kinabuhi, kabahin sa pagtampo sa kaayohan sa katilingban, ug gitumong alang sa paglambo sa katawhan ug sa nasud.

Dugang pa niini, ang tawo nga gi-umol pag-ayo sa Kristohanong paagi dili magtugot nga mobotar alang sa usa ka politikal nga programa o usa ka balaod nga supak sa sukaranang sa pagtoo ug moralidad. (Compendium of the Social Doctrine of the Church n. 273)

Adunay tulo (3) ka rason nganong bililhon ang pag-botar karong umaabot nga eleksyon:

Una, ang pagbotar timaan sa atong kagawasan. Kagawasan nga nagsukad sa atong dignidad isip tawo. Dato man o kabus, propesyonal man o dili, babae man o lalake, kita dunay katungod ug katungdanan nga mu-botar. Tungod kay ang pagbotar nagpunting sa atong abilidad nga mu-suta ug mu-susi sa angayang mangulo ug mangalagad sa atong komunidad.

Ikaduha, kini usa ka pag-awhag dili lamang sa pagkupot sa atong katungdanan ug pribileheyo isip mga lumulupyo sa nasud, kon dili pagkab-ot usab sa oportunidad nga makatukod og mabungahon, malinawon, ug hapsay nga komunidad. Ang pagbotar usa ka pagpadayag sa atong pakiglambigit sa uban aron makab-ot ang mithi ug pangandoy sa kinatibuk-ang komunidad. Kung di ka mu-botar, timailhan kini nga wala kay labot sa kaugmaon sa tanan.

Ikatulo, ang tumong sa pagbotar kanunay mao ang pagtukod ug kultura nga pabor sa kinabuhi ug kinaiyahan pinaagi sa pagpili ug mga lideres nga muduso sa mga balaod nga nahisubay niini. Kung atong baliklantawon, ang Dios mipili usab ug hari nga maoy mangulo sa iyang piniling katawhan. Ang atong pagpili usab ug mga pangulo, subay sa atong konsensya, pagpadayag sa kabubot-on sa Dios.

Sa katapusan, hinaut nga atong gamiton kining panahon sa pagbotar aron mapadayag atong gugma – gugma sa nasud, gugma sa pamilya, gugma sa komunidad, gugma sa kinaiyahan, ug labaw sa tanan gugma sa Dios. (Perry Neil G. Patayon)