Pastoral visit nagkainit

“Parish pastoral visit obligasyon sa obispo” – Abp. Valles

Human sa mga parokya sa Sto. Rosario sa Toril ug St. Joseph sa Sasa, ikatulo nga parokya ang St. John Paul II sa Los Amigos, ULA ang mainitong midawat sa nasugdan nga pagbisita-pastoral sa halangdong Arsobispo sa Davao, Most Rev. Romulo G. Valles, D.D., sugod niadtong Septembre 28 ngadto sa 30 niining tuiga.

Sama sa gilantaw nang daan, ang mainitong pagdawat sa Arsobispo sa nangandam nga kaparian ug mga layko sa matag parokya nagpadayag sa malipayon nga panag-uban sa panaw sa pagtoo subay sa Ebanghelyo. Sa pinakaunang parokya nga mitakda sa bisita-pastoral, gipasabot ni Arsobispo Valles atol sa iyang homiliya sa Misa sa GKK San Agustin nga sakop sa parokya sa Sto. Rosario, nga ang nakalahi niining maong pagbisita sa parokya kaysa atol sa kasaulogan sa piyesta sa parokya mao ang paghimulso sa kinabuhi sa mga tawo. Kini obligasyon sa Obispo. Nakahigayon usab ang Arsobispo sa pagpadayag sa kahulogan sa iyang sungkod ug suot nga itom nga sutana.

Napakita usab ang kaubang pagpanaw sa nagkalain-laing katilingban nga nagmugna sa usa ka parokya sama na lamang sa presensiya sa mga Couples for Christ, Divine Mercy, Knights of Columbus ug uban pa. Anaa usab ang mainitong pag-inigsuonay tali sa ubang tinuohan o relihiyon sama na lamang sa mga kaigsuonan natong Muslim nga midawat usab sa pagbisita sa Arsobispo didto sa parokya sa St. Joseph sa Sasa nga pinangulohan sa kura paroko nga si Fr. Leonardo Dublan, Jr.

Dili magpaulahi ang pag-presentar sa matag Servant-Leaders sa Gagmay’ng Kristohanong Katilingban (GSLs) ug mga miyembro nga maoy naglangkob sa matag parokya isip usa ka banay sa mga magtotoo nga kabahin gayod sa gitakdang kalihukan sama na lamang sa parokya sa St. John Paul II sa Los Amigos nga gipangulohan sa kura paroko nga si Fr. Russel Bantiles. Dinhi niining parokyaha usab gipakita ang kahimtang sa panudlanan sa parokya ug ang paghimamat sa Core Team sa Stewardship program sa parokya.

Isip gitawag sa pagpuyo sa pagkamaayong piniyalan, kabahin sa maong hagit ang pagtimbang-timbang sa pagkaanaa sa kalipay ug kasakit, kalampusan ug kapakyasan, kahayahay ug kalisod nga masinati sa panaw sa pagtoo. Kini ang usa sa mga paningkamot sa paghimulso sa Arsobispo sa pagbisita sa panon nga gisalig kaniya sa nagkadaiyang parokya niining lokal nga Simbahan sa Davao.