Pagkamaampoon ug Pagkamasinugtanon

Puno sa kalipay ug hudyaka, malipayong gisaulog sa Parokya sa St. Mary of the Perpetual Rosary, Buhangin ang ika-37 nga Kapistahan kaniadtong Oktubre 01, 2023 inubanan sa tema: “Santa Maria sumbanan sa mga Piniyalan uban sa diwa sa Kahiusahan, Paglambigit ug Partisipasyon.” Gisugat sa Parokya ang unang adlaw sa Bulan sa Pagrosaryo pinaagi sa kasaulogan sa kapistahan sa Inahan sa Kanunay’ng Pagrosaryo.

Sa takna nga alas dies sa buntag, gisaulog ang Pontifical Mass nga gipangulohan ni Most. Rev. Romulo G. Valles, D.D. ang Arsobispo sa Davao inabagan ni Msgr. Jaime Gamboa, Rev. Fr. Dionisio C. Tabiliran, Kura Paroko, Rev. Fr. Boy Roland Ong, Rev. Fr. Kim Lachica, S.J., Rev. Fr. Rowel Quinamage, TOR, ug Rev. Fr. Allan Fiel. Nakigduyog usab sa Santos nga Misa ang mga bag-ong gi-ordinahan nga mga diyakono nga sila Rev. Angelo C. Espinas nga gikan sa maong parokya, Rev. Cecilio L. Canico, Rev. Julius E. Lugay, Rev. Ranie Boy L. Pamplona ug Rev. Alcris G. Panganiban.

Sa homiliya ni Abp. Valles iyang gitimbaya ang mga parokyano ug dayon nahisgutan nga ang parokya sa St. Mary of the Perpetual Rosary susama sa titulo niini nga ‘Perpetual Rosary’, mainampoon ang mga parokyano sa matag panahon. Matod pa sa Arsobispo nga matag ampo nato sa Santos nga Rosaryo, miduol kita sa ngalan ni Santa Maria ug atong gipangamuyo nga kita iyang dad-on padulong sa misteryo sa kaluwasan nga gikan sa iyang anak nga si Jesus. Talagsaon ang kasaulogan sa kapistahan sa parokya gumikan anaa ang presensya sa lima ka mga bag-ong diyakono nga na-ordinahan sa Archdiocese of Davao ug naghangyo usab si Abp. Valles nga i-apil sa atong mga pag-ampo ang gasa sa bokasyon ilabina na sa pagkapari.

Adunay tulo ka mga butang ang gihatagan og dakong bili sa Arsobispo.

Ang una niini gisaysay sa Unang Basahon gikan kang Propeta Ezekiel diin nag-ingon nga ang mga pamaagi sa Ginoo dili makatarunganon o dili patas. Modangop kita kang Santa Maria nga unta giyahan kita nga makita ang pamaagi sa Ginoo.

Ikaduha niini kinutlo gikan sa sulat ni San Pablo ngadto sa mga taga Corinto diin nagpahinumdom nga atong buhaton ang mga butang alang sa ubang tawo. Tabangan unta kita sa Mahal nga Birhen, nahibalo siya sa atong huna-huna’g kasing-kasing, magpabilin unta siya isip atong Inahan.

Ang ikatulo gikan sa Ebanghelyo ni San Mateo nga nagsaysay sa sambingay sa duha ka managsoon diin gisugo sila sa ilang amahan nga motrabaho sa parasan. Midomili ang unang igsoon apan miadto ra diay gihapon apan ang ikaduhang igsoon misugot apan wala midayon pag adto sa parasan. Matod pa ni Abp. Valles adunay mga panahon nga susama kita niining ikaduhang igsoon nga mibalibad ug wala motuman sa iyang saad. Si Santa Maria usab tuod man wala makasabot pag-una sa gisaysay sa anghel kaniya, siya mihatag gihapon sa iyang oo. Kini magpabiling dakong hagit kanatong mga Kristiyano maong modangop nasad kita usab kang Santa Maria nga atong ihatag ang atong ‘oo’ sa tinuod nga kinabuhi. Gitapos ni Abp. Valles iyang homiliya pinaagi sa pagpahinumdom nga sulod sa Santos nga Misa adunay pag-ampo alang kang Santa Maria tungod kay siya nagtindog sa ubos sa krus ni Kristo ug diin siya padayon nga maga-uban kanato, magdasig ug maglamdag kanatao aron mamahimo kitang mga hingpit nga mga anak sa Diyos.

Viva Maria ug Malipayong Piyesta!

(Allyza Hope J. Tabigue, GKK SoCCom)