Pagbansay Sa Migrant Ministers Gipahigayon

Adlawng Sabado, petsa 14 sa bulan sa Octubre nagpahigayon og Trainer’s training ang ministriya sa Migrants sa Archdiocese of Davao nga gipangulohan ni Rev. Fr. Dexter Veloso isip Migrant Director. Ang maong pagbansay gipahigayon sa San Isidro Labrador, Parish Hall, Lumondao. Aduna nay nahimong pakighimamat sa mga Migrant ministers nga gipadala sa ilang tagsa tagsa ka parokya niadtong milabay nga Agosto 17, 2023. Sa maong pakighimamat nahatagan na ug impormasyon ang mga partisipante kabahin sa mga kalihukan ug buluhaton sulod sa maong ministriya pinaagi sa tabang ug pagpasabot ni Bro. Lito Abadilla nga mao ang regional program coordinator para sa Mindanao sa CBCP-ECMI.

Ang maong pagbansay gilangkuban sa 79 ka mga migrant ministers nga gikan sa nagka lain-laing parokya sa Archdiocese of Davao.

Gisugdan ni Bro. Lito Abadilla ang pagbansay pinaagi sa pagsaysay mahitungod sa sitwasyon sa mga OFW dri sa Pilipinas diin kadaghanan sa mga OFW mga kababayen-an. Gipasabot usab ang mga salient features sa illegal recruitment (RA 8052) ug Trafficking in person (RA 9208). Dugang pa niini, nahibaluan usab sa mga partisipante ang OFW case management Flow ug ang mga programa ug serbisyo nga gi implementar sa Department of Migrant Workers (DMW) ug Overseas Workers Welfare Administration (OWWA) para sa mga OFW.

Sa kinatibuk-an, gipasabot ni Bro. Lito nga ang simbahan adunay dakong responsibilidad diha sa pagalagad sa katawhan ilabina sa mga kaigsuonang anaa sa gawas sa nasud ug ilabi na gayud ang mga pamilya nga nahibilin dri sa Pilipinas.

Nanghinaut ang Migrants Ministry sa Davao nga mapa abot sa tagsa tagsa ka Parokya ang tumong sa Ministrya ug mapaambit kini sa mga kumunidad ilabaina diha sa gagmayng kristahonong katilingban (GKK) arun daghan ang mapahibalo ug maka ambit sa serbisyo.

Sa pagkakaron, padayon pa na ginapaningkamutan sa Migrants Ministry sa Davao nga makahimo ug mga haum nga programa isip suporta ug pagpanalipud sa atong kaigsuonang OFW. (Princess Loren S. Dompor)