Maayong Magbalantay Panahon sa Piniliay

Gitambongan sa pipila ka mga kandidato sa eleksyon sa managlahi nga Barangay, sakop sa San Roque Parish-Malabog ang Santos nga Misa sa adlaw’ng Dominggo Oktubre 15, 2023 alas siyete sa buntag nga gipangulohan ni Rev Fr. Ramon Jamora uban sa bag-ong diyakono nga si Rev. Angelo Espinas, sulod sa Santos nga Misa adunay pinalahi o espesyal nga pagampo alang sa mga kandidato sa eleksyon ug nanaad sila sa katarong alang sa hapsay, matinud-anon, malinawon ug katoohan nga piniliay.

Human sila mabendisyonan ilang gipirmahan ang ilang panaad. Matod pa ni Fr. Ramon, ang Simbahan wala namolitika, ang pagampo alang sa tanan. Matod pa sa ebanghelyo daghan ang anihonon gamay lang ang mangangani, daghan ang nagpapili apan gamay lang ang pilion, sa tanan nga mapili unta pantay pantay ang pagtagad o paghatag serbisyo sa katawhan sama sa atong Langitnong Amahan walay pinalabi, managsama ang tanan sigon sa tagsatagsa nga panginahanglan.

Human sa Santos nga Misa adunay gipahigayon nga pormasyon alang sa mga GKK Soccom ug PSA nga gidumala ni Rev. Angelo Espinas, iyang gilakbitan ang mga importanteng topiko nga makadugang pagtulon-an og makapalig-on isip mga binunyagan nga gikutlo gikan sa libro sa Catechism of the Catholic Church. Atol usab niining adlawa gipahigayon ang seminar alang sa mga 5 ka GKK nga walay katekista ug ang 12 ka PSKB, Pangulo sa Kristohanong Banay nga gipangulohan nila Mr. & Mrs. Elmo ug Faith Sevilla. Busa mapasalamaton ang matag ministriya niining adlawa nga puno sa gugma ug kalipay sa pagpangalagad sa Ginoo kay daghan ang nakat-onan ug nadugangan na usab ang Ministrya sa Katekista nga gidumala sa Parish Coordinator nga si Sis Jeanet Arañez ug ni Rev. Angelo Espinas aron mahimong malampuson ang maong Seminar.

Ala una sa hapon gihimo ang usab ang PPC meeting diin gitambongan sa mga Parish Coordinator ug 11 ka mga Zone Coordinator diin gihisgotan ang mga umaabot nga kalihukan karong Nobyembre ug Sending Forth sa mga PSL nga magresponso panahon sa kalagkalag, uban sa pagtugot ug pagaprobar sa among kura Paroko Fr. Arnold Balaquinto.

Kanunay Dalaygon ang Dios! (Arlene Tarnate, San Roque Parish-Malabog Soccom | Photos by Jozeil Crodua)