Gasa sa Bokasyon Palig-onon

Pagkaanindot nga gasa kanatong tanan dinhi sa Dyosis sa Davao tungod kita naka saksi sa ordinasyon sa atong lima ka igsoon nga sila si Rev. Alcris Panganiban, Rev. Ranie Boy Pamplona, Rev. Julius Lugay, Rev. Angelo Espinas ug Rev. Cecilio Canico niadtong ulahing adlaw sa bulan sa Septembre nga mao usab ang kulminasyon o pagtak-op sa Bulan Sa Bokasyon. Gani man bag-uhay lang pod nato nga nasaksihan ang ordinasyon ni Rev. Ritzchild Cariaga niadtong Septembre 8.

Ang bokasyon sa pagkarelihiyoso dili gayod sayon ug kini gidawat sa atong mga kaigsuonang diyakono. Sumala pa sa pagbalik tan-aw sa pipila nato ka mga diyakono, sila kuno nadani sa pag-ampo tungod lang gyud sa mga painit nga ipaambit matag tapos sa pag-ampo sa santos nga rosaryo. Tuod man kaniadto wala pa nila masabti ang kabililhon ug kalipay nga hatod sa pag-ampo apan ang mga pagkaon nga ilang giambitan maoy susisa ilang pagkatukob o pagka hook sa pagbalik-balik, pag-uban sa ilang mga ginikanan ug kini sinugdanan sa pagtubo sa ilang liso sa pagtoo.

(Photo by Brenda P. Milan)

Matod pa kanila, kinahanglan gayod nga dunay panahon sa paghilom, pagpamalandong aron masayran, masabtan ug madunggan ang tingog sa Dios kon unsa ang iyang plano alang kanato. Tuod man dili tanan gitawag sa relihiyosong kinabuhi, apan kitang tanan gitawag diha sa pagka balaan. Usa sa mga hinagiban nga ilang bitbit sa matag-adlaw ang ilang kanunay nga pagdangop sa pangaliya sa mga santos labi na sa atong mahal nga Inahan, Birhen Maria. Ang pag-ampo sa santos nga rosaryo ug ang pagbitbit niini bisan-asa maoy nakadungag sa ilang kalig-on sulod sa ilang pormasyon.

Sa ilang hamtong nga pangedaron tataw kayo nga sila nag gahin sa saktong panahon sa pagpamalandong kon unsa ang pagboot sa Ginoo diha sa ilang kinabuhi. Wala sila magdali, ila using giila ang ilang kaugalingon isip mga anak sa Dios, isip binuhat nga sama sa Dios ug diha sila mikupot sa kamatooran nga kitang tanan, tinawag sa gingharian.

Nanghinaot kitang tanan nga diha sa ilang ordinasyon, daghan pang mga kabatan-onan ang madasig sa pagsunod sa kinabuhing relihiyoso ug madani sa pagkinabuhi sulod sa balay alampoanan.