Covenant Signing Mass gipahigayon alang sa umaabot nga Barangay Elections

Inubanan sa pagsaulog sa kapistahan sa Birhen sa Santos nga Rosaryo, gipahigayon usab ang Covenant Signing Mass niadtong Oktubre 7, nga gipangulohan ni Rev. Fr. Mervin George Maglana, ang Kura Paroko sa San Miguel, Panacan.

Gitambongan kini sa mga kandidato gikan sa Barangay Sasa ug Barangay Panacan ug pipila ka mga parokyanong botante ug mga miyembro, sa Barangay Auxiliary, mga kapulisan, ug Parish Coordinating Council.

Gipasabot sa Kura binase sa sulat sa atong Arsobispo ang kalabotan sa simbahan ug sa politika. Gihangyo usab niya ang makanunayong pag-ampo hilabi na karong panahona.

Human sa Santos nga Misa, gipahigayon ang Pagpanumpa sa Katarong ug Covenant Signing sa mga kandidato gikan sa Barangay Sasa ug Panacan. Gisugdan kini sa mga Barangay Captain candidates ngadto sa SK candidates.

Kining panghitaboa tubag sa tawag sa atong Arsobispo Romulo G. Valles, D.D. mahitungod sa matinud-anon, hinlo, ug makahuluganon nga piniliay sa umaabot nga Barangay ug SK Elections karong Oktubre 30, 2023. (Joneila Laruya)