Ang Piniliay

Dili sayon ang magpapili isip kandidato, hilabina sa panahon karon, dili lang ang kasikatan isip usa ka lider, ug kamaayo sa pagpamaba’ apan mas gikinahanglan ang pinansyal nga suporta alang sa mga kandidato.

Niadtong Oktubre 13, 2023, nagpahigayon ang San Pedro Cathedral ug Covenant Signing o Pagpanumpa sa Katarung alang sa mga kandidato nga nagpapili o midagan alang sa lokal nga piniliay.

Adunay kapin gatos ka mga hamtong ug batan-ong kandidato gikan sa napulo ka Barangay nga mao ang: 1A, 2A, 3A, 34-D, 35-D, 37-D, 38-D, 39-D, 40-D ug ang Brgy 76-A ang pinaka dako nga barangay nga nahisakop sa Distrito Uno sa siyudad sa Dabaw nga mitambong ug mitubag sa panawagan sa atong simbahan.

Human sa Santos nga Misa uban sa atong mga kaparian ug sa Parish Administrator nga si Rev. Fr. Voltaire P Dimol, giubanan ang mga kandidato gawas sa simbahan, diin gipahigayun ang pagpanaad ug ang pagperma sa gisaad. Kini ang mamahimong gabayan arun nga maangkon ang sagrado, hapsay, matinud-anon, malinawon nga piniliay, nga kini takos ug nagsubay sa maayong mga pulong ug mga buhat ug nagsubay sa atong batakang balaod. Gisaksihan kini sa mga nagkalainlaing pundok sa katawhan diha sa kumunidad sama sa mga kapulisan, maestro’g maestra, ug uban pang mga hut-ong sa katilingban nga mitambong ug misaksi sa maong tigom.

Kita gitawag sa pag-alagad, diha sa mapadayunong misyon ni Jesukristo. Ang pagtawag sa matag usa labi na sa mga kandidato nga nagpapili ug mapili, usa ka gasa nga makapahimoot Kaniya. Hilabi na kung matuman nato ang iyang mga kasugoan diha sa pagserbisyo sa katawhan, nga kita mahimong ehemplo sa uban, ug dili magpahaylo sa mga materyal ug kalibutanong panginahanglan, pangayoon nato kini. (Rosalinda C Jabonillo | San Pedro Cathedral SocCom)