Walay pinalabi

Ika-25 nga Domingo sa Ordinaryong Panahon (Sept. 24, 2023)
Is 55:6-9 / Ps. 145:2-3, 8-9, 17-18 / Phil. 1:20-24, 27 / Mt. 20:1-16

Usahay makaingon ta sa atong kaugalingon nga wala nato nabati ang presensya sa Dios sa makadaghang higayon sa atong kinabuhi. Sa pagkatinuod, ang mga tawo nag-ingon, ang Dios dili dayon motubag sa atong mga pag-ampo. Nganong gitugotan sa Dios nga mahitabo ang daotang mga butang? Daghan kaayo tag reklamo kaniya. Kung unsay gusto nato, naa dayon, usahay atong mga pag- ampo nagsentro sa mga bahandi ug dili na sa Dios. Gusto tag hayahay nga kinabuhi, kung dili makatubag ang Dios sa atong mga pag-ampo, manglood dayon ta, dili nata mag-ampo tungod kay wala gihatag sa Dios atong gusto.

Karon nindot kaayo ang pahinumdom sa atong Ebanghelyo nga dili ipugos ang atong mga gusto sa Dios. Dili nato himoon nga ang Dios molihok sama sa usa ka tawo, sa kaangayan ngadto sa Dios. Ang Dios mao ang Dios ug adunay paagi sa pagbuhat sa mga butang. Ang Dios adunay iyang kaugalingong sukdanan ug paagi sa pag-ihap sa panahon. Ang Dios wala magsunod sa sistema sa mga gibug-aton ug mga sukod sa tawo. Ang sistema sa ganti sa Dios nagdepende sa pagkamanggihatagon sa iyang kasingkasing, dili sa atong mga paningkamot o mga himan sa pagsukod. Ang Dios nag-ihap sumala sa kadagaya sa iyang kasingkasing. Ang Dios dunay walay kinutuban nga suplay sa gugma. Sama sa giingon sa Unang Pagbasa, “Ang akong mga hunahuna dili mao ang inyong mga hunahuna, ni ang inyong mga dalan akong mga dalan.” (v.8) Ang atong kinatibuk-ang kaayohan mao ang nag-unang prayoridad sa Dios. Gidasig sa Dios kadtong nahisalaag sa pagbalik sa labing dali nga panahon. Dili igsapayan sa Dios kung dugay na ba nga wala nato siya panumbalinga. Gusto lang sa Dios nga mahibalik kita. Ang Dios wala magpihigpihig batok sa ulahing mga naghinulsol.

Karon, patas ba ang Dios? Oo, Siya makiangayon, ug walay bisan kinsa nga makatupong sa Iyang kaangayan. Ang Dios dili matulog apan kanunay nga nagbantay sa pagabiabi kanato nga naghinulsol bisan sa katapusang minuto. Siya mapuangoron, mahigugmaon, maluluy-on, ug makiangayon sa tanang butang. Gihigugma kita sa Dios ug imbes nga kita magbayad sa atong mga sala, Iyang gidala ang Iyang bugtong nga Anak aron sa pagluwas kanato. (Bro. Ranie Boy Pamplona)