Panag-uban sa mga Piniyalan sa Panaw sa Misyon Ipadayon

Usa sa mga paborito nga panultihon ni St. John Paul II, mao kini: “Duc in altum.” Sa Ingles pa, “put into the deep,” ug sa Cebuano, “palawod kamo” (Lukas 5:4).

Kining mubo, simple ug yano nga panultihon gikan kang Jesus ngadto kang Simon Pedro ug sa mga kauban, nagtudlo kanato og duha ka mga importanteng pagtulon-an: Una, sa tibuok gabii sa pagpangisda ni Simon Pedro ug mga kauban, wala silay kuha nga isda. Ang mga pulong ni Jesus nagdasig kanila sa pagpasensiya (patience) ug paglahutay (perseverance). Ang pagkahamtong sa pagtoo dili dali ug paspas nga mahitabo dinhi kanato. Usahay, mapandol ta ug mahagbong sa atong panaw. Unya mobalik ta pag-usab pagpangayo sa kaluoy ug pasaylo sa Dios. Ikaduha, kon magpalawod kita, adunay risgo (risk) ug kakuyaw (danger). Dili ta angay nga magpabilin lang sa atong naandang kahimtang. Molihok kita diha sa pagpalawod sa lawom nga tubig sa lanaw nga masaligon sa mapadayunong pag-atiman sa Dios kanato.

Ang atong mga paningkamot karon sa atong panag-uban sa panaw sa misyon dinhi sa atong parokya isip mga piniyalan nagsentro niining mga mosunod nga mga programa ug proyekto: FOOD BANK FOR THE POOR, FOOD ALWAYS IN THE HOME (F.A.I.T.H. program), MARRIAGE ENRICHMENT SEMINARS ug KASALAN sa GKK sa Family and Life Apostolate, Pag-atiman sa KINAIYAHAN (OUR MOTHER EARTH, OUR COMMON HOME), Pagpalig-on sa mga GAGMAY’NG KRISTOHANONG KATILINGBAN (GKK) ilabina sa mga KABATAN-ONAN niini.

O Dios, sa among pagpalawod sa panaw sa misyon, adunay mga risgo ug kahadlok. Ang among pasensiya ug hugot nga pagtuo nagkaanam nga nagkahinay tungod sa mga pagsuway. Hatagi kami sa imong kalooy ug mainitong gugma aron magmalahutayon kami sa panaw sa misyon uban ug diha Kanimo. (Fr. Pedro P. Lamata)

Mensahe Fiesta 2023

MINAHAL NAMONG MGA PAROKYANO,

Among pagtimbaya kaninyo sa kalinaw ug kalipay sa atong Ginoo!

Ang Buhat sa mga Apostoles nagpahinumdom kanato pinaagi niining mga Pulong: “Nagpadayon sila (ang unang Kristohanong Katilingban) pagtigom matag adlaw didto sa Templo ug naghiusa sila pagpangaon uban sa malipayon ug mapaubsanong kasingkasing…” (Buhat 3:46).

Hinaut unta nga kining mga balaang Pulong padayon nga magdasig kanato uban sa hagit paghubad sa buhat niining mosunod: padayon ta sa atong panaw sa panagtigom sa pagampo ug panaghiusa sa diwa sa pagkapiniyalan diha sa misyon sa atong pamilya ug GKK uban sa malipayon ug mapaubsanong kasingkasing.

Malipayong pagsaulog sa atong ika-walong kapistahan ni San Francisco de Asis dinhi sa atong parokya!

Kaninyo mapasalamaton,

Fr. Pedro P. Lamata & Fr. Rey T. Sabuero