Pagpa-ambit sa Pagtulon-an Angay Batunan

Ang Parish Social Communications sa St. Mary of the Perpetual Rosary Parish, Buhangin nga gipangunahan ni Ms. Hermelita Mapute isip Parish SoCCom Coordinator mipahigayon ug usa ka pormasyon o panagtapok kaniadtong Hulyo 30, 2023, ika-limang Dominggo sulod sa bulan ug gisugdan sa alas 8:00 sa buntag hangtud sa alas 12:00 sa udto sa Parish Seminar Hall.

Usa sa mga highlights ug labing mahinungdanon sa pormasyon mao ang paghatag higayon ug oportunidad sa mga kaubanan sa pagpa-ambit sa mga nahibaloan diin sila ang nakasalmot sa nagkalain laing seminar, trainings ug uban pang mga aktibidades nga gipasiugda sa Archdiocesan SoCCom Apostolate.

Ang mga sharers mao sila: Sister Norie Kris Santillan usa ka Parish SoCCom ug staff diin iyang gipaambit ang kabahin sa DANGUPANAN; Sister Maria Dexie Calvo, GKK SoCCom sa San Isidro Labrador, Ciudad de Esperanza nga nagpaambit kalabut sa kalampusan sa WORLD SOCIAL COMMUNICATIONS DAY; Brother Arsenio H. Berdera Jr., GKK SoCCom sa Sto. Niño, Lapanday, Tigatto sa iyang topic nga WRITESHOP (JOURNALISM AND NEWS WRITING TIPS), ug ang ika-upat mao si Sister Allyza Hope Tabigue usa ka Lector and Commentator, ug GKK SoCCom sa San Isidro Labrador, Julliville sa iyang pagpaambit kabahin sa PHOTOJOURNALISM.

Ang inisyatibo nga gihimo sa Parish SoCCom Coordinator nga mapadayag ug mapadayunon kanunay ang pagdasig sa tanang mga GKK SoCCom diha sa ilang mga tahas nga gisangon nga mao ang pagpaambit sa mga pagtulon-an nga nahibaloan ug paghatag ug inspirasyon sa uban aron sa pagpadayon sa tumong ug misyon.

Ang mitambong sa pormasyon mikabat sa 53 gikan sa nagkalain-laing GKK nga sakop sa St. Mary of the Perpetual Rosary Parish nga adunay napulo (10) ka sona. Nahimong mabungahon ang gihimong pormasyon pinaagi sa paghatag ug oras sa sharing kabahin sa nakat-onan nila diha sa ilang pagpaminaw sa upat ka mga mamumulong ug mapasalamaton sa kalampusan pinaagi sa panguna sa maabtikon nga Parish SoCCom Coordinator, Ms. Hermelita Mapute inubanan sa makanunayong suporta sa Kura Paroko, Rev. Fr. Dionisio Tabiliran diin ang tumong sa panagtapok mao ang pagbatun kanunay sa pagpa-ambit sa mga pagtulon-an ngadto sa uban. Dalaygon ang DIOS! (Arsenio H. Berdera, Jr.)