Kolaborasyon sa pag-atiman sa mga migrante giandam

Isip pagsaulog sa Adlaw sa mga Migrante sa tibuok kalibotan, Septembre 24, pagahimuon ang tigom sa mga pamilya sa mga migrante sa tibuok Arkidyosis sa Davao didto sa Parokya sa San Isidro Labrador, Lumondao. Ang Santos nga misa pangulohan ni Most Rev. Romulo G. Valles, D.D., Arsobispo sa Davao.

Usa sa mga paagi sa paghatag og gibug-aton niining maong tigom mao ang pagpaambit sa dinapit nga usa ka layko gikan sa Episcopal Commission for the Pastoral Care of Migrants and Itinirant Peoples sa Catholic Bishops Conference of the Philippines (CBCP). Siya magdalag balita kung unsa na ang kahimtang ug asa na karon ang atong mga igsuong migrante.

Gibutyag ni Fr. Dexter Veloso, Direktor sa Archdiocesan Commission for the Pastoral Care of Migrants and Itinerant Peoples ug Kura Paroko sa San Isidro Parish, Lomundao nga pakusgan ang kolaborasyon sa atong mga kaigsuonan nga naningkamot nga molangyaw sa abroad kay daghan silag mga hagit nga nahimamat, ilabina nga sila halayo sa ilang mga mahal sa kinabuhi.

Sa iyang mensahe, si Fr. Veloso miawhag sa tanan nga mohalad sa atong mga “pag-ampo para sa mga migrant workers because they are facing challenges, just like us. But mas challenging sa ilaha because these migrant workers are not with their families.”

Gisaysay usab ni Fr. Veloso nga sa pagkakaron ginahimo na karon sa Migrant apostolate sa Archdiocese sa Davao ang pag-profile sa mga pamilya sa mga migrant workers sa ilang parokya. Siya miingon: “Gituyo namo ni, gihimo namo ni aron makipag-collaborate sa ilaha, sa ilahang pamilya. How can the Church help them? So consultation, collaboration nga diin unsa ang matabang sa Simbahan ug unsa ang ilang gi-expect sa Simbahan nga matabang sa ilang pamilya.”

Gitanyag ni Fr. Veloso ang dakung paglaum nga bisan pa man sa panimpalad sa atong mga migrant workers sa layong dapit sa kalibotan, “mahiusa gihapon sila sa presensiya diha sa grasya sa Ginoo.”

Daghan pa ang mga gihan-ay sa Migrant Apostolate sa Arkidyosis sa Davao ang himuon sa umaabot nga mga adlaw. Kabahin niini ang pag-collaborate sa mga eskwelahan diin anaa ang mga anak sa mga migrant workers. Makighimamat usab ang mga lumilihok sa maong apostolado sa mga pamilya mismo aron pagpalalom sa panag-uban nga pagpanaw alang sa dugang pagtinabangay.