Kausaban lamang ang dili mausab

Gisaulog niadtong Agosto 28, 2023 ang ika-51 ka tuig nga kapistahan sa Gagmay’ng Kristohanong Katilingban ni Sr. San Agustin sa Parokya sa Malabog uban sa tema: “Sr. San Agustin Sumbanan sa Tiunay nga Pagkapiniyalan sa Diwa sa Komunyon, Partisipasyon, ug Misyon. Gisugdan ang selebrasyon sa Santos nga Misa ubos sa pagpanguna sa among Kura Paroko Rev. Fr. Arnold Balaquinto.

Sa iyang homiliya siya miingon, “Ang dili lang gayud mausab sa kalibutan mao ang kausaban, kay matag karon ug unya, matag segundo, matag takna, matag panahon, matag adlaw nga molabay aduna gayud kabag-ohan sa atong pagkinabuhi sa atong pamilya ug sa palibot sa atong kinabuhi. Ang pangutana: Asa man gayud ang sukaranan sa kabag-ohan? Walay lain kundili sa kasing-kasing sa matag usa”.

Ug sama sa kinabuhi ni Sr. San Agustin, siya nahimong bantugan nga ehemplo sa usa ka bagtik nga makasasala nga nausab ug nabag-o kay ang kabag-ohan tinuod man sa grasya sa Dios ug nahimong banggiitan nga Santos sa Simbahan basi sa kabag-ohan nga iyang gidawat sa iyang kinabuhi. Nabag-o siya sa kalantip sa iyang panghunahuna pinaagi sa pulong gikan sa iyang kasingkasing.

Walay puas sa paglitok ug mensahe pasalamat ni Mr. Edgardo Pocong PSK sa maong katilingban, alang sa iyang mga miyembro pinaagi sa moral ug pinansiyal nga tabang ug sa tanang mga kaubanang Sona 5-B.

Adunay upat ka mga bata nakadawat sa Sakramento sa Bunyag. Makita usab ang kamaya, kalipay ug kasadya sa tanang kabataan nga miapil sa ilahang mga kalingawan nga parlor games.

Hinaut unta sama ni Sr. San Agustin uban sa pangandoy o mithi nga kung unsa man ang kangitngit sa kinabuhi, ang kahayag sa kabag-ohan maoy atong lintunganay aron inig-abot sa panahon kita kahimut-an sa atong Ginoo. Atong Daygon ang Dios. VIVA SR. SAN AGUSTIN! (Nalyn Largo)