Panagduyog Uban ni San Alfonso

Nagmalampuson ang ika-21 ka tuig nga selebrasyon sa pagkatukod isip usa ka parokya sa Mandug ang San Alfonso Ma. de Liguori. Ang kapistahan adunay tema, “San Alfonso: Uban sa mga piniyalan sa synodong panaw sa simbahan,” tema nga gihaom sa synodong proseso sa kinatibuk-ang simbahang katolika.

Ang pagpangandam sa maong dakong selebrasyon gisugdan sa wala pa misulod ang tuig 2023. Kini aron malikayan ang mga kakulian nga nahitabo sa mga milabayng kapistahan. Gipangandaman sab kini ug sayo kay gikatakda na nga mao na kini ang ulahing kapistahan nga pagasaulugon sa katawhan kauban si Fr. Gemasol Ortiz, isip kura paroko. Gusto himoong mahinungdanon sa mga lideres ang maong kapistahan para napod mabalik ug mapakita nila sa ilang palangga nga kura paroko ang ilang dakong pasalamat sa tanang mga nabuhat ni Father Jojo sa parokya. Mahinumduman nga sa paglingkod ni Father Jojo niratsada ang mga progreso sa maong balay alampoanan, gikan sa maayong sound system ug television sets isip projector, nindot nga church ceiling, altar stone works, ug ang bag-ohay lang nga consagrahan nga altar sa milabayng kapistahan.

Nahimo usab nga busy ang mga batan-on tungod sa mga kalihukan nga ilang gi organisa kauban ang Parish Church Council o PCC. Sa unang adlaw sa nobena, July 23, gihapigayon ang Zumba sa Parokya year 2, nga nahimo usab nga fund raising activity sa mga kabatan-onan. Sa misunod nga mga adlaw July 24 hantod July 29 gipahigayon ang Pasundayag sa Parokya kung asa nagpakita sa ilang nagkalain-laing talento sa pagkanta, pagsayaw ug uban pa ang mga katawhan nga naggikan sa nagkalain-laing cluster areas nga sakop sa parokya nga mao ang Callawa Area, Upper Mandug Area, Lower Mandug Area, DDF South, Central ug North Area. Tataw gayud ang kalipay ug kasadya sa mga ning tan-aw sa mga pasundayag, nga biskan paman ang ulan wala makapaundang sa maong kalihukan. Walay gipahigayon nga pasundayag sa milabay nga Hulyo 30, kay adunay gipahigayon nga Fellowship Dinner sa Las Palmas Verdes; ang tumong sa maong kalihukan mao ang pagpangitag tabang alang sa on-going project sa parokya nga mao ang pagpasemento sa ground sa Parokya. Dako kaayo nga suliran kung mag ulan kay mabulit ug lapok ang Parokya. Nagmalampuson ang maong fellowship dinner ug gidungog gayod ang pagampo ug hapit tanan nga mga mitambong nihatag sa ilang mga pledges ingon man cash donations alang sa proyekto sa parokya.

Sa sunod nga adlaw, Hulyo 31, adunay gipahigayon nga Basketball exhibition game, Davao Clergy batok Brgy. Mandug officials, pagkagabii usab gipahigayon ang grand procession sa patron. Aduna usab gibuhat nga pilgrimage or panaw-duaw sa imahen ni San Alfonso sa mga nagkalain laing GKK sa Parokya. Nanukad ang maong panaw-duaw Hulyo 24, diin unang gibisita sa imahen ang GKK San Isidro sa Sitio Bonggan, Brgy. Talandang. Hulyo 25 sa GKK San Roque, lower Suadan, Brgy Callawa. Hulyo 26, GKK San Miguel, upper Suadan, Brgy. Callawa. Hulyo 27, GKK Our Lady of Fatima, Sitio lower Fatima, Brgy. Mandug. Hulyo 28, GKK San Miguel, Sitio Luman, Brgy. New Valencia. Hulyo 29, GKK Immaculada Concepcion, Mandug Proper. Hulyo 30, GKK Our Lady of Penafrancia, Deca Homes Esperanza Tigatto, ug Hulyo 31 GKK San Roque sa Sitio Coog Brgy. Mandug. Mapasalamaton ang mga GKK leaders sa maong mga nahisgutang GKK sa gibuhat nga pilgrimage, una kining higayon nga gipahatabo sa parokya, dako usab nga kalipay kini hilabi na sa mga GKK nga layo kaayo sa parokya sama sa GKK San Isidro Sitio Bonggan nga sakop sa Brgy. Talandang. Dako usab kaayo na tabang ang panaw-duaw aron mas mailhan pa sa mga nahisakopan sa parokya ang kinabuhi sa ilang patron.

Sa adlaw sa kapistahan, Agosto 1 nadesisyonan sa Parish Coordinating Council nga tawagon kini ug Panagduyog Festival tungod sa nagkaduyog balik ang katawhan human sa makamatay nga pandemiya, tungod napod sa pagampo ug pangama ni San Alfonso. Nagsugod ang Santos nga Misa sa alas otso sa buntag ug ang nangulo niini mao ang halangdong Arsobispo sa Davao, Most Rev. Romulo G. Valles, D.D. kauban ang mga kaparian sa arsidyosis ug mga relihiyoso. Nabatyagan sa atong Arsobispo ang kadaghanon sa mga nanambong sa selebrasyon bisan paman adlaw kini sa pagpanarbaho ug klase sa ubang mga estudyante. Iya usab nga gipahinumduman ang mga manimbahay sa mensahe sa Ginoo pinaagi sa Salmo nga nag ingon, “Ang Ginoo maayo ug maloloy-on.”

Nisunod dayon pagkahuman sa Santos nga Misa ang Pasundayag sa Panagduyog kung asa nagtigi ang mga Cluster Areas sa ilang mga festival dances. Usa usab sa mga contest highlight sa Panagduyog Festival ang Purok beautification contest. Sa ulahi nagmadaugon ang DDF SOUTH AREA sa Festival Dance Contest kung asa ilang gipakita ang Sinulog Festival. Sa Purok beautification contest, nahimong mananaog ang purok sa CALLAWA AREA kung asa inspired kini sa mga spider webs ug ginama sa ratan ug uban pang mga raw and natural materials.

Sa ulahi, nagpasalamat si Fr. Jojo sa tanang mga lideres sa GKK, tanang ministriya, ug ang Finance team nga maoy nangita ug paagi nga masustinar ang panginahanglan sa parokya sa kapistahan niini. Nagpasalamat usab siya sa tanan nga batan-on nga aktibong nakiglambigit ug ingon man midumala sa tanang mga kalihukan hilabi na sa mga nightly presentation ug ang highlight sa kapistahan nga mao ang Pasundayag sa Panagduyog. (Jomar Narciso – Parish SoCCom)