Ginoong Hesukristo: Sentro sa Kinabuhi sa Kabatan-onan

DACUDAO – Dili masukod ang dakong kalipay nga gibati sa mga Salesyanong batan-ong partisipante sa Youth Encounter (YE) kaniadtong Hulyo 27-29, 2023 nga gipahigayon sa parokya sa Maria Manananabang sa mga Kristiyanos (Mary Help of Christians Parish) – Dacudao. Gitambongan kini sa mga aktibong Pangulo sa mga Batan-on (PSB) sa 25 ka mga GKK nga nahisakop sa maong parokya. Matud pa sa mga kabatan-onang lideres, nakabati sila ug kahupayan diin ilang napagawas ang tagsa-tagsa ka mga krus (problema) nga dugay na nilang gipas-an ilabina gayud diha sa pamilya.

Ang tulo ka adlaw nga aktibidad nagpamatuod nga taliwala sa kahugyaw sa mga kabatan-onan, aduna silay istorya sa kalipay ug mga kasakit sa kinabuhi nga nagpaabot lamang ug higayon nga mapagawas kini ug ang YE nahimong kasaligang lugar sa pagpaambit sa gibating gihambin. Klaro kaayo ang mga batan-on sa ilahang pagkaaktibo apan wala hibaloi nga likod sa mga katawa adunay istoryang maanindot paminawon. Dugang pa man, mas naila sa mga partisipante ang kabililhon sa Ginoo nga ang Labing Gamhanang Amahan mahimong sentro ug kanunay nga prayoridad diha sa mapadayunong pagpuyo isip maayong Kristiyanong lideres. Walay pagduha-duha nga si Hesukristo ang nagsilbing kahayag diin Siya anaa kanunay maga-uban kanato. Natagaan ug higayon ang mga partisipante sa tumang pag-ampo ug pagpamalandong sa panahon sa individual prayer session.

Sa panahon sa circle of love session, midagayday ang mga luha sa kabatan-onan sa dihang nadungog ang lain-laing istorya sa mga partisipante. Nasayran nga nag-ugat sa pamilya ang kasagarang problema sa mga batan-on sama nga matud pa nila, walay komunikasyon diha sulod sa panimalay ilabina sa ginikanan. Apan luyo pa man sa mga kasinatian, nahiaguman sa mga batan-ong lideres ang dakong paglaum sa kinabuhi sa dihang ilang napagawas ang ilang mga kasakitan.

“Daghan kaayo kog realizations and mas napalalom ang akong pagtuo ngadto sa Ginoo, ilabina ang akong relasyon sa Iyaha.” Matud pa man ni Sydney Manombe, usa sa mga batan-ong partisipante sa Youth Encounter.

Gidasig ang mga kabatan-onan nga taliwala sa mga pagsalikway nga ilang nahiaguman kini kambyohan ug affirmation diin mas ipakaylap ang pagsinabtanay ilabina gayud ang panaghinigugmaay diha sa isigkatawo ilabina sa miyembro sa pamilya. Gidasig usab sila sa pagkamapasayloon ilabina sa pagpakighiuli sa ilang mga higala ug mahimong maampoon sa matag-usa.

Dili ikalimod nga ang kinabuhi sa tawo panagsa sama sa kaanindot sa adlaw apan muabot usab ang unos diin makaagi kita ug gagmay og dagkong mga problema sa kinabuhi nga muhagit sa atong pagtuo. Apan luyo niini, makaingon kita nga parte gayod kini sa atong pagpuyo buot pasabot normal lamang kini sa tawo. Kung kita mulantaw sa laing bahin sa atong kinabuhi, ang mga problema nga atong nasagubang naghatag ug dakong oportunidad sa pagtubo. Taliwala sa kalisud sa kinabuhi, mapamalandongan gayud nga adunay plano ang Ginoo sa tanang higayon sama sa ilang giingon ang tanang nahitabo adunay rason. Sa kadaghan sa atong mga problema, atong hinumduman nga mas daghan ang mga grasya nga atong nadawat gikan Kaniya. Atong hugtan ang atong paggunit sa Ginoo kay kanunay anaa ang Iyahang presensiya tungod pinangga man kita Niya ug dili pasagdan.

Ang Youth Encounter usa ka dakong oportunidad nga nakatabang sa mga batan-ong lideres nga makakab-ot ug kaayohan gikan sa mga kasinatian ug kasakitan, ilabina nga ang mga nakat-onan mas makapalig-on sa pagserbisyo isip batan-ong lider inubanan sa kinasingkasing nga commitment ug mahibaloan ug masabtan ang kaanindot sa tinuoray nga relasyon sa Ginoo. Klaro kaayo usab nga pinaagi niining pormasyon, nakatukod usab sila ug panaghigalaay. Dakong hagit gayod kini sa kabatan-onan sa pagtuman sa sugo sa Ginoo nga magsugod diha sa kaugalingon nga magmalig-on ug magmatinud-anon.

Pinaagi sa mga YE Formators, nagiyahan ang mga kabatan-onan sa napulog-duha ka sesyson: Welcome to the Family, Cycle of Life, Come and See, Please Listen, Two Blind Men, Personhood in Community, Affirmation, Rejection, Circles of Love, The Prayer, Storms in Life, Vision and Commitment. Mapasalamaton kaayo ang mga partisipante ngadto sa Don Bosco Dacudao Youth Council (DBDYC) nga gipangulohan nila ni: Rev. Fr. Ariel M. Arias, SDB isip Youth Director, Rev. Fr. John L. Cardinal, SDB isip kura paruko ug ilabina ngadto sa mga YE Formators nga gipangulohan ni Mrs. Leoncia I. Darunday inubanan nila Mrs. Gloria Aranas, Mr. Jaime Duran, Mrs. Flordeliza Duran, Mrs. Adelina Cabatingan ug Mr. Bartolome Carillo. (Jeffrey B. Mondejar, Jr.)