Gahom Sa Kwarta

Dear Ate Emz,

Kasagaran natong mga tawo dunay kahuyang sa salapi. Ma liso na dayun ang atong pangisip. Ang dignidad ilisan lamang ug kantidad pwera lamang sa uban apan dili tanan.

Akong na obserbahan nga bisan pa kaniadto ug hangtud karon, anaa pa gihapon nagapadayon kini nga bisan asang establisimento, departamento ug uban pa nga dunay kalambigitan sa kwarta ang tentasyon anaa. Tungod sa atong mga panginahanglanun kwarta ang kinhanglan aron atong maangkon.

Subo nga kamatuoran usahay kita ma ulipon sa salapi. Biktima usab ako tungod kay sa akong mahinumduman kaniadto, ako nagpakaulipon sab niini. Sa panahon karon lisud pag-pugong labaw na kung duna kay bisyo. Saksi ako niini kay ako usa ka gastador kaniadtong ulitawo pa ako. Adunay ipabuhat nako dapat dunay ibaylo nga kantidad. Wala kanako ang mga charity nga buhat, kinahanglan dapat dunay kapalit nga amount. Matag lihok kwarta, puro kwarta. Yes, given na nga manarbaho apan unta sibo lamang ug dili sobra nga nakapahimulos na.

Akoa lamang kining hinay-hinay nga naundang sa dihang nagminyo ug nagka anak na. (45 anyos na ako karon ug naay 3 ka mga anak). Bisan sa gamayng sentimo bililhon kaayo. Sakripisyo sa mga personal nga panginahanglanun tua padulong sa akong mga anak ug pamilya. Nangandoy ako ug haruhay nga kinabuhi apan kung ang kapalit man lang pagkawala sa dignidad ug kredibilidad mas gustohon ko na lang ang simpleng kinabuhi.

Hinaut unta.

Daghang Salamat,
Jett

* * * * * *

Dear Jett,

Sumala sa usa ka inilang parish priest nga si Fr. Dave Concepcion, “ang tanan gasa sa Ginoo”. Kabahin niana ang materyal nga gasa sama sa salapi. Importante kaayo kini sa atong mga panginahanglan, sa atong mas maayong kinabuhi og mga daghang oportunidad. Kung naa tay kwarta maangkon nato ang pinaka the best sa tanan. Ang salapi nanalipod kanato sa luwas nga kinabuhi sa ingon nga kita makabayad sa atong pang adlaw-adlaw nga mga galastohan.

We used to hear others say that money is the root of all evil. Actually, money per se, is not, but rather, it is the love of money that makes it so. Mao nga duol gyud kita sa mga tentasyon labi na kung daghan kita niini. Sama sa imong kasinatian, dili maayo ang imong pagdumala niini tungod kay ang nahitabo murag sa imong panglantaw, ang dignidad sa tao nailisan na ug kantidad. Sa tanang lihok naa gyud kalambigitan kining salapi. Sa imong kabahin, nahimo kang gastador, (murag wala nay ugma?), ug ang tanan kinahanglan dunay ikabaylo nga kwarta. Ang pulong nga libreng serbisyo o charity wala sa imong bokabularyo. Kanunay ka modawat ug dili mohatag. In other words, you seem to consider yourself as looking at everything through the eyes of love for money. Subo lang gyud kaayo kining panglantaw sa bahandi nga gihatag kanimo sa atong Ginoo.

Atong hinumduman nga tinugyanan kita ug panahon, talento ug bahandi (time, talent, treasure). Isip piniyalan, kinahanglan nga manubag kita niining tanan sa diha nga kita makig-atubang na sa atong Ginoo pag-abot sa panahon.

Pinangga gyud ka sa atong Ginoo kay wala ka Niya gipasagdan nga hangtud sa hangtud mag-ingon ani na lang gyud ang dagan sa imong kinabuhi. Salamat tungod kay niabot ang panahon nga nakaamgo ka nga mag bag-o sa imong panglantaw. Sa pagkatinuod lang, usa kini ka grasya sa atong Ginoo nga imong giablihan ang imong kauglingon sa oportunidad sa pag-usab sa imong panglantaw nga gasa sa salapi. Nahimo ka nga responsable sa maayong paggamit niini. Salamat usab sa mga grasya nga gibubo dinha sa imong kinabuhing minyo diin imong gihatagan ug bili ang matag sentimo. Imbes nga hunahunaon kung unsa ang angay kanimo, naa nay elemento sa pagsakripisyo, giving up, dying to self, para sa mas importanteng prayoridad…ang imong pamilya.

Tinuod nga ang pagpuyo sa usa ka simple nga kinabuhi mohatag kanimo og labaw nga kalinaw sa hunahuna. Tungod niini imong masinati ang ginaingon nga inner joy, labi nga kung naay mga charitable activities nga mahimong kabahin sa imong lifestyle.

Tugoti ko nga ipaambit kanimo ang istorya bahin sa usa ka milyonaryong negosyante. Naa na niya ang tanan nga kalampusan sa iyang business empire. Ug bisan pa niini, mibati gihapon siya og kahaw-ang sa iyang kinabuhi. Naay usa ka higayon nga gidapit siya sa pag donate og mga wheelchairs sa mga bata nga adunay problema sa paglakaw. Dili lang siya nagdonate niini, apan personal gyud niya nga gitunol kini sa mga bata. Nakita niya sa ilang mga nawong ang tinuod nga kalipay. Lahi ang iyang gibati nga kalipay ug murag wala siya kasabot ug dili niya ma explain kini. Sukad niadto, gihimo na niyang adbokasiya ang pag-alagad, pagpaambit sa iyang bahandi, ug pagpalipay sa uban. He set up a foundation for the differently abled children, sharing his treasures in making life easier for them. Consequently, he feels he is living a fuller, a more meaningful, and happier life.

Sa imong bahin, Jett, padayon sa paggamit ug pagpaambit sa imong salapi alang sa kaayohan dili lang sa imong pamilya kon dili alang sab sa kaayohan sa uban.

Hinaut nga ang atong Ginoo moganti kanimo ug pila pa ka pilo tungod sa imong pagkamanggihatagon ug alang sa maayong paggamit sa imong mga bahandi.

God bless you more.

Ate Emz