Dobleng Selebrasyon

Adunay duha ka panghitabo sulod sa usa ka adlaw diha sa Santos nga Misa niadtong unang adlaw sa Agosto. Una mao ang selebrasyon sa piyesta ni Alphonsus Marie de Ligouri, nga mao ang nagtukod sa kongregasyon sa Most Holy Redeemer o mas inila nga mga Redemptorist. Ang ika-duhang selebrasyon mao ang pag-instalar sa bag-ong kura paroko nga si Rev. Fr. Gary Alvarado, CSsR. Ang misa gipangulohan ni Most Rev. Romulo G. Valles D.D. diin duna puy mga paring redemptorist ang mikonselebrar.

Paghuman sa homiliya, gisunod dayon ni Monsignor Jaime Gamboa, ang atong Chancellor sa Archdiocese of Dava ang pagbasa sa Appointment Letter ni Rev. Fr. Gary Alvarado, CSsR. Ang Arsobispo nipresintar sa pipila ka mga sakop sa Parish Pastoral Council, mga Parish Workers ug mga GKK leaders ngadto sa Kura Paroko nga mao ang mutabang sa pagpanday ug pag implementar sa mga balaod, apil sab ang pag-amuma sa katawhan sa Dios.

Human ang misa, gipahigayon ang panihapon ug mubo nga programa isip pagsaulog sa kapistahan ni San Alfonso ug usab pahinungod sa bag-ong kura paroko. Anaa sa kamot sa usa ka kura paroko ang pagtuman sa panglantaw sa parokya nga maghimog suod nga relasyon ngadto sa mga GKK. Busa angay nato siyang suportahan alang sa kalambuan sa parokya ug sa mga sakop niini. (Mary Grace Gonzales | OMPH Parish, GKK SoCCom)