Ang Pagtoo sa Babaye nga Kananea

Ika-20 nga Domingo sa Ordinaryong Panahon (August 20, 2023)
Is 56:1, 6-7 / Ps 67:2-3, 5, 6, 8 / Rom 11:13-15, 29-32 / Mt. 15:21-28

Mga igsoon, diha sa Ebanghelyo nga gisaysay kanato ni San Mateo, usa ka makapadasig nga kasinatian mahitungod sa panag-istorya ni Hesus ug sa usa ka babaye nga Kananea. Nasayod kita nga ang babaye adunay lahi nga kasinatian sa iyang pagtoo nga dili sama kanato nga mga sumosunod ni Kristo ug si Hesus usab nagpakita sa iyang dakong kalooy ngadto sa babaye. Kini nga kasinatian sa babae diha sa Ebanghelyo nagtudlo kanato bahin sa pagbag-o sa atong panghunahuna ug panglantaw sa pagtoo isip mga sumosunod ug mga anak sa Dios. Tugoti ako sa pagpaambit sa akong pamalandong sa pipila lamang ka mga punto ug kini nga mga punto hinaot magdala kanato arun kita mahiduol pag-ayo diha sa Dios.

Una, ang tinuoray nga pagtoo sa babaye ngadto kang Hesus. Madungog nato diha sa ebanghelyo nga ang babaye puno sa kadasig sa iyang kaugalingon samtang nagpadayon siya sa pagpangita og tabang alang sa kaayohan sa iyang anak. Bisan pa man nga sa sinugdanan adunay mga babag sa katilingban batok kaniya tungod sa iyang pagtoo ug kasinatian, apan ang iyang walay hunong nga pag-ampo diha sa Dios ug pagpangayog tabang kang Hesus, nagpamatuod sa pagkamatinud-anon sa iyang pagtoo, bisan pa man sa mga kabudlayan nga iyang nasinati diha sa iyahang kinabuhi.

Ikaduha, ang pagpakita sa tinuoray nga kalooy ni Hesus ngadto sa babaye. Ang unang tubag ni Hesus ngadto sa babaye mahimo nga mabatian nga lisud alang kaniya. Ug usa kini ka dakong hagit sa babaye nga Kananea nga mamahimong magmatoohon ug magmadasigon sa kaugalingon. Apan ang tinuoray nga tubag sa babaye nagpakita usab kini sa iyang personalidad ug naghimo sa mas labaw nga pagsabot ug pagpaubos niini diha sa iyang kaugalingon. Kini usab nagpakita og paghulagway nga kinahanglan kita nga mas madasig sa atong kaugalingon diha sa hagit sa atong kasinatian sa kinabuhi.

Sa katapusan, hinaut mahisama kita sa usa ka babaye diha sa atong ebanghelyo, nga pinaagi sa dakong pagtoo ug kalooy sa Dios, magdala unta kanato diha sa dakong pagbag-o sa atong kaugalingon. Kini usab nagpagsabot ug nagpahinumdom kanato sa dakong kaayo ug walay puas nga paghatag sa grasya sa Dios diha sa atong kinabuhi ug kini nagpabilin nga mahinungdanon hangtod karon taliwala sa kalisod nga atong nasinati. (Bro. Julius Lugay)