Ang Pagtahan sa Kinatibok-an Ngadto sa Dios

Ika-22 nga Domingo sa Ordinaryong Panahon (September 3, 2023)
Jer 20:7-9 / Ps 63:2, 3-4, 5-6, 8-9 / Rom 12:1-2 / Mt 16:21-27

Ang pagsunod sa Dios nga walay pagpas-an sa krus usa ka tentasyon nga gihanyag sa yawa aron kita mahisalaag sa dalan sa matuod nga kaluwasan. Ang pagpadayag sa atong Ginoo diha sa iyang pag-ingon “Ang buot mosunod kanako kinahanglan nga talikdan niya ang iyang kaugalingon, pas-anon niya ang krus, ug mosunod kanako.” Ang pagsunod sa atong Ginoo nagkinahanglan og pagtahan sa tibook kinabuhi ug pagpas-an sa krus tungod kay kini ang dalan sa kaluwasan. Apan ang pagsunod sa dalan sa Ginoo kinahanglan nga kita gawasnon nga mipili niini. Kita wala gipugos sa pagpili sa dalan sa Dios. Ug kon mopili kita sa dalan sa Ginoo siya nagpahinumdom kanato nga kinahanglan masayod kita sa tanan kon unsa ang atong dangatan. Ang pagpili tungod sa kaignorante kini moresulta ngadto sa pagmahay ug kasubo.

Ang pagtalikod sa kaugalingon kini wala magpasabot nga dili na kita molihok alang sa atong kaugalingon apan kini nagtimaan nga talikdan nato ang makasasala natong kaugalingon aron makahatag kita sa atong kaugalingon ngadto sa Dios ngadto sa kinatibuk-an gayod. Motaliwas kita sa atong kaugalingong paagi aron makasunod kita sa paagi sa atong Ginoo. Kay kon dili kita mogawas sa atong kaugalingon walay lugar si Kristo diha sa atong kinabuhi.

Dugang pa niini, ang pagpas-an sa krus kini nagtimaan nga sa tanang higayon sa atong kinabuhi andam kita sa pagsakripisyo sa tanan bisan pa og kini gitiman-an sa atong kinabuhi. Ang pagtahan sa atong kinabuhi tungod ug alang sa gingharian sa Dios. Ang pagkahanaw sa atong kinabuhi tungod sa atong pagsunod kang Kristo kita makakaplag sa matuod nga kinabuhi diha sa atong Ginoo.

Sa katapusan, mosunod kita sa atong Ginoo tungod kay kita iyang mga tinun-an ug dili kita iyang mga kaatbang. Bisan asa ang atong Ginoo atoa usab kita. Ang pagsunod sa mga lakang sa atong Ginoo kini nagtimaan nga anaa ang krus ug ang kadaugan nga mao ang pagkabanhaw. Kini maghatod kanato diha sa pagsakripisyo ug pagkamabungahon. Ato kining pangayoon nga grasya sa atong Ginoo, aron makasunod kita sa kinatibuk-an sa iyang mga lakang aron makasulod kita sa gingharian. Amen.