Your healing our calling

“We are for service, because this hospital is built for that. We want to keep that point.” – Most Rev. Medil S. Aseo, DD

Nagsadya ang tibuok syudad sa Tagum sa balita sa pagbalik sa operasyon sa usa sa mga pinaka karaan nang ospital. Ang kaniadtong Bishop Regan Memorial Hospital nga gidumala sa usa ka grupo sa mga doktor nagrenta sa maong ospital, ug sa pagtapos sa ilang kontrata, midesisyon ang Diyosis sa Tagum sa panguna ni Most Rev. Medil Aseo, DD nga ibalik sa simbahan ang pagdumala niini. Ang Christ the King Specialists Hospital gibendisyonan, adlawng Martes, Hulyo 18, 2023 nga gitambongan sa daghang mga bisita.

Gani naa sa ocho syentos hangtod sa usa ka libo ang ilang giimbita. Ang maong ospital gisugdan tuig mil nwebe syentos saysenta y tres (1963) ni kanhing Bishop Joseph Regan, MM ug tungod niini siya gitagaan diha sa pasidungog pinaagi sa usa ka dakong statwa gawas sa ospital. Una kining nakita niadtong adlawa atol sa pagbendisyon sa tibuok ospital.

Sumala sa Medical Director nga si Dr. Ricardo Laganson, ang mga pasilidad sa ospital, state of the art na gayud ug mukumpara na sa mga ospital sa mga dagkong syudad sa Pilipinas. Gani dili na ikalimod ang pagbutang sa titulo nga kini usa na gayud ka ospital nga dunay mga espesyalista. Kini gipasigarbo diha sa Emergency Medicine Specialist nga si Dr. Arthur Salvador nga bisan gani wala pa o ginaplanohan pa ang EMS kon Emergency Medical Services sa dakbayan, andam na ang Christ the King Specialists Hospital nga dawaton ang mga pasyente nga dunay grabeng mga sakit tungod dinha palang sa emergency room duna nay mulantaw nga espesyalista. Kini nga proseso gilaoman nga mulapnag sa tanang mga ospital kay mao sab kini ang epektibo nang gipadagan sa laing nasud.

Bisan dili pa in full operation ang ospital, duna na silay mga serbisyo sa laboratory tests ug uban pang mga Out Patient services. Gani duna na silay 78 ka mga pasyenteng natabangan pinaagi sa ilang renal dialysis service.

Tapos sa motorcade sa tibuok syudad, pormal kini nga gilunsad uban sa cutting of ribbon kauban si Bishop Medil ang Chairman sa Board, ug uban pang mga myembro ilawom sa Rex Medicus Corporation nga mao ang opisyal nga magdumala sa maong ospital. Gisunod dayon ang pagbendisyon sa mga departamento ug uban pang lawak sulod sa ospital, gitabangan kini sa mga clergy sa Diyosis nga full support sa maong kadaugan. Gani dili lang sila ang naa, apil pud ang duha ka obispo nga sila si Bishop Emeritus Wilfredo Manlapas ug Archbishop Emeritus Fernando Capalla gikan sa Davao. Sa mensahe ni Msgr. Federico Mantica, Vice Chairman, tuod kuno nga kulang pa sila sa kahanas niini nga ministriya, apan dili kulang ang pagpangandam ug paningkamot. Gani hapit na matapos sa iyang Masters in Hospital Administration ang Presidente ug CEO nga si Rev. Fr. Allan Alindajao.

Panahon sa homiliya ni Bishop Medil, iyang gipasalamatan ang mga tawo nga nagpaluyo niini nga kadaugan. Siya mibungat nga, “We are for service, because this hospital is built for that. We want to keep that point.” Tuod man, usa kini ka dakong lakang alang sa diyosis apan nagmalaumon ang mga kaparian nga uban sa tabang sa mga layko, magmapadayunon ang pag-atiman sa mga masakiton.

Kon ug galing matagaan na ang ospital sa License to Operate, ang mga Tagumeños makalaom ug tinuoray nga tabang gikan sa ospital. Bisan tuod mga eksperto na ang mga doktor ug mahal ang mga gamit ug pasilidad sa ospital, maningkamot ang administrasyon sa paghatag ug sakto nga presyo alang sa mga katawhan.

Magsugod usa sa 100 bed capacity ang ospital ug kon galing mudagsa ang mga pasyente walay lain padulngan kondili ang expansion kon pagpadako sa ospital. Duyog sa administrasyon sa Christ the King Specialists Hospital, atong isalig sa Dios ang kalampusan niining ministriya sa kaayohan. (Cover photo by The Mindanet Balita FB Page)