Si Kristo ang Bahandi

Ika-17 nga Domingo sa Ordinaryon Panahon (July 30, 2023)
1 Kgs 3:5, 7-12 / Ps 119:57, 72, 76-77, 127-128, 129-130 / Rom 8:28-30 / Mt 13:44-52 or Mt 13:44-46

Ang atong Ebanghelyo karon naghisgot kabahin sa labing mahinungdanon nga bahandi nga atong mahuptan diha sa atong kaugalingon. Ang atong Ginoo nag-awhag kanato sa pagpangita niining maong bahandi. Ang sambingay nga gipaambit sa atong Ginoo dunay dakong bili diha sa atong tagsatagsa ka kinabuhi ug makatabang sa atong desposisyon sa pag-angkon sa maong bahandi. Ang sambingay sa nalubong nga bahandi ug magpapatigayon nga nangitag matahom nga perlas managsama gayod, apan interesado kita sa unsay kahulogan niini diha sa atong kinabuhi. Ang bahandi mao ang kapuno sa mga gasa nga gihatag sa Dios kanato. Ang perlas nga nagtimaan sa katahom sa gingharian sa langit mao ang kanunay natong gipangita. Ang bahandi nga nakalutan ug ang perlas nga nakaplagan sulod sa taas nga pagpangita niini; kining maong paghulagway sa duha ka higayon sa pagkakaplag, nakapuno sa kalipay sa nakakaplag niini.

Ang pagtoo, bokasyon, tinuod nga kaalam, tinguha alang sa Langit, mao ang mga butang nga usahay madiskobrehan nato diha sa atong kaugalingon, ilabina kon kita kanunay nga naminaw sa atong kasingkasing. Ang atong kinaiya isip tawo kon adunay makapuno kanato, makapalipay diha sa atong kinabuhi diha usab ang atong kaugalingon makaangkla. Ang Dios nga maoy tinubdan sa tanang grasya ug panalangin maoy magpuno sa kakulang sa atong kinabuhi. Ang grasya nga gihatag sa Dios kanato maoy atong gamiton aron kita makasunod Kaniya ug magtabang kanato sa pagsulod sa gingharian sa langit.

Sa katapusan, ang imahe sa Dios nga mao ang bahandi nga nalubong diha sa kinahiladman sa atong kasingkasing. Kon ato kining makaplagan, andam kita nga biyaan ang tanan tungod ug alang sa Dios. Ug ang perlas nga nakaplagan mao ang imahe ni Kristo nga mao ang tinuod nga tawo. Ang pagbaligya sa tanan mao ang paghukas sa atong karaang pagkatawo ug pagsul-ob sa pagkatawo ni Kristo. (Rev. Soren Abellanosa)