Padayon sa Misyon: Salesian Youth Movement Philippines

Usa ka mabungahong selebrasyon ug panagtigom sa 60 ka mga Salesyanong lideres sa Salesian Youth Movement (SYM) Philippines sa gipahigayong National Assembly Days diin gilangkuban sa tulo (3) ka Salesian provinces sa nasud nga mao ang Philippine North Province (FIN), Philippine South Province (FIS) apil na dinhi ang duha ka mga partisipante gikan sa Mary Help of Christians Parish-Dacudao, ug Daughters of Mary Help of Christians (FMA-FIL) Province.

Ang National Assembly Days (NADs) milungtad gikan Hunyo 27 hangtud Hulyo 2 nga gipahigayon sa Don Bosco Retreat House, Lawaan III, Talisay City, Cebu. Aduna kini tema nga ‘PADAYON’ usa ka bisaya nga termino nga nagpasabot nga to carry on/continue. Usa kini ka dakong oportunidad ilabina sa mithi sa Salesian Youth Movement(SYM) nga mahisgutan ug maaksyonan ang mga nagkadaiyang hagit nga nahiaguman sa mga kabatan-onang lideres sa tagsa-tagsa ka komunidad lakip na niini ang pagpalambo sa pormasyon (Formation), pagsaulog kang Kristo diha sa pang adlaw-adlaw nga kinabuhi (Faith Celebration), sa pagmaya sa panagtigum sa mga Salesian Youth Leaders (SYLs) ug animators (Fellowship) ug ang pagplano sa mga aktibidades alang sa umaabot nga panahon (Service). Inubanan kini sa giya sa mga Salesyanong pari ug madre nga sila Fr. Fidel Ma. D. Orendain, SDB (Provincial Superior – FIS), Fr. Rooney John Undar, SDB (Commission on Youth Ministry – FIS Delegate), Sr. Debbie Ponsaran, FMA ( Head of Youth Ministry Sector – FIL), Fr. Ramil Maranan, SDB (SYM Delegate – FIN), Fr. Vince Michael Sabal, SDB (SYM Delegate – FIS), Sr. Joralyn Selloria, FMA (SYM Delegate – FIL).

Pinaagi sa diskusyon, nagkahiusa ang mga partisepante sa pag-ila sa hagit sa mga kabatan-onan inubanan sa One Salesian Youth Movement Coordinating Team (OSCT) diin sila nagtinabangay sa pagplano sa mga kalihokan alang sa nasyonal ug lokal nga lebel, ug paghimo sa Manifesto diin ang tanang delegado gihatagan ug higayon nga maka sugyot kung unsay mga maayo nga pamaagi sa pagresolba sa maong mga hagit.

Sa katapusan, nahimo kining hagit sa mga partisipante sa pagpadayon sa misyon sa pagserbisyo isip mga servant leaders apan magsugod kini pinaagi sa pagbag-o una sa kaugalingon. Ang hiniusang buhat ug paningkamot sa tanan, uban sa walay hunong ug kinasingkasing nga suporta sa tibuok katilingban, ug makita dinhi nga magpabilin kini nga lig-on sa iyang dedikasyon sa pag-atiman sa mga kabatan-onan, gigiyahan sa mga mithi ug pagtulon-an ni St. John Bosco uban sa grasya sa Dios pinaagi sa pagpataliwala sa Mahal nga Inahan makahatag ug paglaum, pagsalig, ug pagtuo sa mga partisipante sa pagpuyo sa Salesian Youth Spirituality (SYS). (Jeff Mondejar and Arra Sumampong)