Mapadayonong Pormasyon alang sa mga GSL

Ang Parish Formation Ministry sa St. Mary of the Perpetual Rosary Parish nagpahigayon og Four Basic Seminars alang sa mga bag-ong Pangulo sa Liturhiya (PSL) ug sa umaabot nga mga GKK Servant Leaders sa ubang ministriya nga wala pa makahuman sa maong basic seminar.

Gipahigayon ang basic seminar niadtong Hunyo 18, 2023 diha sa Parish Seminar Hall nga nagsugod sa alas 8 sa buntag hangtod sa alas 4 sa hapon diin gipangulohan kini sa Formation Ministry Coordinator nga si Lina Montilde ug sa suporta sa Kura Paroko, Rev. Fr. Dionisio C. Tabiliran.

Ang unang bahin mao ang Evangelization ug GKK Orientation seminar. Ang ikaduhang bahin mao ang Basic Bible ug Basic Liturgy seminar. Kini gitambongan sa nagkalain-laing mga ministriya sa parokya nga mikabat og 68 ka mga partisipante. Ang Four Basic Seminars mao ang usa sa mga requirement alang sa buot mamahimong GKK Servant Leader.

Ang tumong sa seminar mao ang pagpasabot isip binunyagan nga kabahin ta sa 3 ka misyon ni Kristo: (a) Pagka Propeta (b) Pagka Pari (c) Pagka Hari. Dugang pagpasabot ang pagkatinugyanan sa mga kabuhatan sa atong Dios Amahan sa langit. Mga piniyalan lamang kita ug dili mga tag-iya. Busa naa kitay dakong responsibilidad isip iyang mga piniyalan diri sa kalibotan. Ang atong mga gasa nga nadawat ang panahon, talento ug bahandi atong amomahon ug palamboon aron makatabang sa labing ubos natong isigkatawo. Labaw sa tanan atong ibalik ang tanang gihatag sa atoa nga himaya ngadto sa Dios.

Sadya ug malampuson ang seminar tungod sa partisipasyon ug kooperasyon sa mga mitambong nga buot mo serbisyo isip GKK Servant Leaders. Dalaygon ang Dios sa kanunay. (Clinita Nartea, GKK SoCCom)