“Kung walay pagpaula sa Dugo ni Kristo, walay kaluwasan (Hebreo 9:22)”

Ang pagtulun-an sa Labing Balaan nga Dugo ni Kristo mao ang usa sa mga mahinungdanon nga bahin sa espiritwalidad sa simbahan nga gitukod ni Kristo, nga nagpahinumdom sa kahalangdon sa iyang dugo nga giula alang sa kaluwasan sa iyang katawhan. Kini adunay lig-on nga pundasyon diha sa sulod sa Santos nga Kasulatan, mga tudlo sa Simbahan, ug mga synodal nga mga kasinatian sa mga sumosunod ni Kristo.

Sa Bibliya, tataw ang kahalangdon sa dugo ni Kristo sa pipila ka teksto. Sa Ebanghelyo ni San Mateo (26:28), si Jesus mismo nagpadayag nga iyang dugo nga ihalad alang sa kapasayloan sa mga sala. Si Apostol Pablo nagtudlo usab sa iyang sulat ngadto sa mga taga-Efeso (1:7) nga kita may kaluwasan pinaagi sa dugo ni Kristo, ug sa sulat niya ngadto sa mga taga-Roma (5:9), gipakamatarong kita pinaagi sa iyang dugo. Kini nga mga teksto sa Bibliya nagpahinumdom sa kahalangdon, gahom ug makaluwas nga pagtuo sa dugo ni Kristo.

Ang mga tudlo sa Simbahan naglig-on sa atong debosyon sa Labing Balaan nga Dugo ni Kristo. Ang Katekismo sa Simbahang Katoliko (CCC 1369) nagpahayag nga sa Misa, ang Simbahan “mihiusa sa iyang halad” ug “nakig-uban kay Kristo sa Iyang paghatag sa iyang kaugalingon.” Gitamod sa Simbahan ang dugo ni Kristo isip usa ka importante nga halad sakripisyo sa kaluwasan nga natuman pinaagi sa misteryo paskwal -pag-antos, kamatayon, ug pagkabanhaw – ni Kristo.

Ang mga synodal nga mga kasinatian sa mga magtoto-o usab naghatag og lig-on nga depensa alang sa pagtuon sa Labing Balaan nga Dugo ni Kristo. Daghan kaayo nga mga disipulo ang naghatag ug testimonya sa ilang mga kasinatian pinaagi sa ilang pagtuo sa Balaang Dugo ni Kristo. Sila buhing saksi sa makalimpyo, ug may kinabuhing dayon nga ilimnon nga ilang naangkon pinaagi sa ilang kasinatian sa Labing Balaan nga Dugo ni Kristo.

Sa katapusan, ang Labing Balaan nga Dugo ni Kristo nakapalig-on sa pagtuo diha sa iyang paghalad alang sa kaluwasan nga nahingpit pinaagi sa kamatayon niya sa krus. Kini nagtawag kanatong tanan sa makanunayong pagpamalandong sa gugma ni Kristo, nga kanunayng andam sa pag-antos bisan paman musantop sa paghalad sa iyang dugo alang sa kaluwasan sa iyang mga higala (San Juan 15:13). (Bro. Ryan R. Mejillano | Catholic Faith Defender, Latin Mass Society of Davao)