Kapistahan ni San Juan, kalipay sa katawhan

Niadtong Hunyo 24, 2023 gisaulog ang ika-58 nga kapistahan sa San Juan Bautista, Parokya sa Lasang uban sa tema: “Ako, Ikaw, PINILAYAN sa pag-amoma sa naglawig nga katilingban.” Gisaulog kini nga puno sa kalipay kon diin gibuhat ang pamukaw sa mga parokyano alas 4 sa kaadlawon pinaagi sa drum and lyre. Human niini, sa takna sa alas 6 sa buntag gisaulog ang Santos nga Misa ug sa alas 9 pinanguluhan sa atong magbalantay, Most. Rev. Romulo G. Valles, D.D gisaulog ang Pontifical Mass. Sigon sa iyang pagpaambit diha sa homiliya gidayeg niya ang pagbisti sa atong tatak nga suot nga mao ang barong ug Filipiniana nga mao ang tatak sa atong pagka Pilipino. Matod niya, dako ang iyang pagpasalamat sa tanang lumilihok uban sa pagtinabangay aron mahimong malampuson ang maong kapistahan. Dugang sa iyang pagpaambit gipalawman usab kini uban sa mga pulong, “Ang Dios nagpili kanato”, “Ang paagi sa Dios, dili paagi sa tawo” ug nga “Mahimo kitang buhing presensya sa Dios sa atong mga kaigsuonan”.

Human sa Santos nga Yukaristiya, gisunod dayon ang pagkaon uban sa mga parokyano palibot sa parokya. Ug tapos niana gisugdan ang mga contest sa zumba ug kiosk beautification kon diin nagpanindutay ug paanyag ang matag sona sa ilang mga kiosko pinaagi sa paggamit sa mga native materials ug pagbaligya sa ilang mga produkto nga naa makita sa ilang sona. Nagpili usab ug mananaog alang sa pinaka nindot nga nagsuot sa barong ug Filipiniana. Sa katapusan napilian kining unom ka best dressed, sa mga kababayen-an: Luzviminda Bongcales, Nathalia Ramirez og Felisa Quidores; sa mga kalalakin-an mao sila si: Berwin Villasencio, Brix Coraje og Ernesto Macayana. Ang mananaog usab sa kiosk beautification mao ang Sona 7. Tapos niana gisugdan ang zumba competition ug gisunod ang padula sa laro ng lahi nga sama sa: pokpok palayok, palo sebo, sack race, pabitin, kwarta sa lubi ug ang pinaka sadya mao ang pagdakop sa baktin ug pato diha sa sulod sa gikurdon nga kulongan.

Puno sa hudyaka ug usa ka talagsaong kasinatian ang nabati ug nasaksihan sa tanang parokyano ug katawhan nga nahimong saksi sa maong kapistahan. Sa katapusan, nagpasalamat usab si Rev. Fr. Jovilo B. Bongay, kura paroko, Parochial Vicar Rev. Fr. Dioscoro Saniel, og si Rev. Fr. Florencio A. Acedo Jr, resident priest sa tanang lumilihok sa pagpangandam aron mahimong malipayon ang maong kasaulogan.

Gipasalamatan usab ang tanang GSL sa pagdumala ug paghatag sa kadasig sa pag-apil ug pagpanguna sa ilang matag sona. Ug sa katapusan, malipayon nga nagpahiyom nga nanguli ang tanang katawhan dala ang usa ka talagsaong kasinatian nga puno sa kalipay ug panalangin. San Juan Bautista, ig-ampo mo kami. (Steven Jay Del Rosario)