Kaniya Lamang ang Kapahulayan

Ika-14 nga Domingo sa Ordinaryong Panahon (July 9, 2023)
Zec 9:9-10 / Ps 145:1-2, 8-9, 10-11, 13-14 / Rom 8:9, 11-13 / Mt. 11:25-30

D iha sa atong ebanghelyo karun nga gisaysay kanato ni San Mateo, gipadayag ni Jesus ang usa ka dakong mensahe sa pagpahinumdom ug pagsalig alang kanatong mga tawo nga nabug-atan, gikapuyan, ug nangitag kapahulayan sa kinabuhi. Gipasalamatan niya ang Amahan tungod sa pagtaho sa mga misteryo sa gingharian sa Dios ngadto sa mga yano ug mapaubsanon. Gipahinumdoman kita ni Jesus nga ang kaluwasan gitanyag gayud alang sa tanan, bisan unsa pa man ang estado sa kinabuhi.

Kini nga panghunahuna nga gisaysay kanato ni San Mateo diha sa ebanghelyo, magsilbi nga usa ka pahinumdom alang kanatong tanan nga si Jesus mismo mao ang punoan sa tinuoray nga kapahulayan ug kalinaw. Sa bisan unsang higayon nga kita makasinati og kabug-aton, kakapuy, o kabalaka sa atong kinabuhi, mamahimo kitang moduol kaniya ug makakaplag kita og kapahulayan diha sa iyang presenysa. Sa iyang pag-aghat kanato sa pagsunod kaniya, mamahimo kita nga mosunod ug magtinabangay kung diin si Jesus mao ang magapas-an sa atong mga palas-anon sa kinabuhi.

Atong nadungog usab nga si Jesus mihatag sa iyang kaugalingon ngadto sa mga gikapuyan ug nabug-atan sa kahimtang sa ilang kinabuhi. Gipadayag usab ni Jesus nga ang iyang yogo sayon lamang, dili bug-at, ug maghatag kini og dalan nga kapahulayan. Pinaagi sa pakigrelasyon ngadto kaniya, kita makakaplag sa tinuoray nga kapahulayan alang sa atong mga kalag ug masinati usab nato ang kahamugaway sa kinabuhi ngadto sa gingharian.

Sa katapusan, pinaagi niining pakigrelasyon nato kang Jesus ug pagsunod sa iyang mga buhat ug sa iyang mga gipanudlo, hinaut nga kini maghatag kanato ug pagsalig og paglaom nga kitang tanan nga iyang mga sumosunod makakaplag og kapahulayan ug kalinaw diha kaniya, bisan pa man sa mga kalisod nga atong nasinati diha sa kinabuhi. Nga kita usab mopadayon nga mamahimong instrumento ngadto sa uban nga gikapuyan, nabug-atan, ug nangitag kapahulayan. (Bro. Julius Lugay)