Kabililhon Sa Kinabuhi, Gituki

Ang binulan nga panagtapok sa mga GKK Servant Leaders sa parokya sa San Isidro Lumondao malampusong gipahigayon niadtong Hulyo 8 tuig 2023 sa alas 9 sa buntag sa Lumondao Covered Court. Ang maong panagtigom gigasahan dinha sa usa ka adlaw nga seminar mahitungod sa Pagkamaayong Piniyalan subay sa dakong kampanya sa Arsidyosis sa Davao ilabina sa Family and Life Apostolate uban sa Dangupanan team. Ang maong seminar nagtuyok dinha sa kamatuoran nga ang tanan gigasahan sa kinabuhi og nga dunay responsibilidad ang matag usa nga ampingan kini. Adunay 674 ka mga partisipante ang mitambong niining talagsaon ug tukma sa panahon nga mga tulumanon.

Ang unang bahin sa maong kalihukan mao ang talk ni Rev. Fr. Orlando Angelia, Director sa Family and Life Apostolate mahitungod sa pagkamugna sa usa ka bata gikan sa sabakan sa inahan diin iyang gipasiugda ang paghatag ug importansya sa atong mga kaugalingon tungod kay dili kita ang nanag-iya niini ug kini hinurman lamang nato sa Ginoo. Dugang pa, gisundan kini sa pakigpulong mahitungod sa Mental Health nga gihatag ni Dr. Jerson John Trocio, RPsy. Iyahang gipaklaro ang tamang pagsabot kung unsa ang Mental Health, gihatagag pagpaklaro usab ang mga mito mahitungod sa Mental Health tungod adunay sukwahi nga pagsabot niini. Gitagaan sab og kabug-aton ni Dr. Trocio ang isyu sa Paghikog o Suicide sa mga bata ug mga hamtong karon. Gihatagan usab og katin-awan sa mga mito ug ang mga dili angay nga buhaton kung makasugat ani nga problema. Gipahibalo usab niya ang mga posible nga mga timailhan ug sintomas ug ang mga posible nga lakang aron mapugngan kini nga problema.

Sa ikaduhang bahin, adunay sistematikong paggrupo nga gihimo aron mahatagan ug espisipikong mga hilisgutanan ang partikular nga mga partisipante. Nagtapok ang mga batan-on alang sa usa ka diskusyon bahin sa hustong paggamit sa Social Media nga gipangulohan ni Ms. Christine Camus ug Dr. Trocio. Ang mga Senior Citizens adunay lain usab nga panagtapok nga gipangulohan ni Fr. Orlando Angelia aron isulti ug ipaambit ang mahitungod sa ilang tahas isip mga katigulangan, lolo ug lola sulod sa usa ka Kristohanong Pamilya. Kadtong mga magtiayon o minyo, adunay panaghisgot mahitungod sa Natural Family Planning nga gihatag kanila nila Ms. Amelita Desquitado ug Lilia Aventurado.

Dakong kalipay ug pasalamat sa mga parokyano ni San Isidro sa maong kalihukan tungod kay kini usa ka pagpamata sa tanan ug aron maklaro ang talagsaon kaayo nga pagpaambit ug pagpaklaro sa maong mga problema sa katilingban. Dakong pasalamat pod kaayo ni Rev. Fr. Dexter Veloso, Kura Paroko, nga gitagaag higayon nga mubisita ang Archdiocesan team sa Lumondao.

Sa katapusan, ang maong kalihokan usa ka nindot nga panagtapok sa mga parokyano aron sa paghisgot sa mga isyu ug problema sa atong palibot. Isip mga anak sa Dios ug mga Kristiyanos, gihagit kita sa paghatag ug bili sa atong mga grasya nga nadawat ilabina sa atong kinabuhi. Ang atong pagkapiniyalan dili lamang kutob sa pinansyal nga mga aspeto apan kini sa tanang aspeto. Kay kita binuhat man sa Dios ug ang tanan nga anaa kita karon, ato kining ibalik Kinaiya. Kini usa lamang ka pahinumdom nga dili kita makalimot sa paghatag og pakabana sa mga tao sa atong palibot. Bulahan kadtong kanunay nga nagamping sa kinabuhi inubanan sa pag-ampo ug pagsalig diha sa Ginoo. (Honey Kaye Etdang | San Isidro Labrador Parish SoCCom)