Garaong Maestro, Malipayong Misyonero

Giordinahan sa pagkapari si Rev. Fr. Hilario Villaver Jr. niadtong Hulyo 15, 2023 adlawng Sabado sa parokya sa Nuestra Señora del Candelaria sa Barangay Kimamon, Sto. Tomas Davao del Norte.

Si Padre inila nga Sir Larry sa iyang mga estudyante ug mga kauban sa Holy Cross of Davao College Inc. Basic Education Department. Sa gipangutana ang iyang kanhing principal nga si Mrs. Fe Corazon Ceniza, panahon nga siya apil pa sa faculty, garaon gyud daw si Fr. Larry ug wala gyud damha nga siya musulod sa relihiyosong kinabuhi.

Makita si Fr. Larry nga malipayon ug si-aw maong daghan sa iyang mga kaubanan sa Holy Cross ang miadto gyud aron pagpakita sa ilang suporta, apil sab ang iyang mga nahimong estudyante tungod sa maayong mga kasinatian sa ilang panag-uban.

Sa gipangutana si Fr. Larry kung unsa ang higayon nga nakapadesisyon kaniya sa pagsulod sa pormasyon, siya mitubag nga nakabati siyag kakulang bisan tuod unom ka tuig-siyang nangalagad isip magtutudlo. Sa iyang pagbalik tan-aw malipayon siya sa iyang kinabuhi kaniadto, makapalit sa iyang gusto, makakaon sa mga lamiang kan-anan, makaadto sa mga lugar nga nindot apan daw dunay kulang.

Nakaplagan niya kining kakulang diha sa gugma sa Dios, ang kauhaw sa pagpangalagad isip usa ka misyonero ug tuod man daw ang iyang mga tiil didto gidala padulong sa Missionaries of Africa kung diin siya naka Come and See o search in.

Dili ikalimod nga si Fr. Larry gikan sa usa sa mga prominenteng pamilya sa Sto. Tomas, apan bisan niana, andam siya sa pagpaubos sa iyang kaugalingon, sa pagpangalagad sa mga nanginahanglan. Pinaagi sab sa suporta sa iyang inahan uban ang tibuok niyang banay, puno siya diha sa kadasig sa pagpaambit sa gugma nga iyang nadawat gikan kanila ug labaw sa tanan gikan sa Dios.