Ang Maayong Piniyalan

Dear Ate Emz,

Sa akong kasinatian, naa akoy grupo nga usa ka circle of Brotherhood and Sisterhood. Ang among tumong ug mga tinguha sa grupo mao ang paghatag ug mga hinabang, assistance, manpower o charity works. Kasagaran namo mga aktibo sa kalihukan sa simbahan ug ang uban sa GKK nga gikalambigitan. Naga promotar og maayong panag-ingnan.

Usa ka higayon niana nagkasabot ang among mga opisyales mahitungod sa mga plano, pagpalambo sa grupo nga makaayo alang sa tanang miyembro. Pakusgan pa ang pag inigsoonay sa ngalan sa Dios. Apan kining among lider sa grupo wala niya masunod ang proseso sa pagpahibalo sa mga opisyales kung unsay iyang mga plano. Matingala na lang mi nga duna diay mga lakang alang sa mga kalihukan. Walay question ang iyang pagka kugihan, hats off ang tanan kaya lang na-uyunan nga iagi gayud sa proseso ang tanan. Ug usa pa, mamahimong walay silbi ang mga opisyales kay kung unsay gusto sa Lider kinahanglan maoy sundon. Dili lamang kausa mahitabo ug sa makadaghan na nga higayon.

Gipalabay na lamang kadto sa mga miyembro ug siya among gisabot. Niabot na sab ang usa ka senaryo ug gumikan lamang sa gamayng rason nga wala paguyon sa mga opisyales ngadto sa iyang gusto, kalit ra siya mibaba sa iyang pwesto ug kalit mitiwalag dayun sa grupo. Unsang klaseng lider nga dili man kabalo mudawat og kritisismo?

Unsa pay silbi sa tingog sa mas kadaghanan kumpara sa kagustohan sa usa lamang ka tawo? Pasabot nga dili mao ang iyang gusto. Sa gamayng hinungdan imo dayun nga hawaan. Sa kasamtangan girespeto namo ang iyang desisyon kay lagi sigurado na ang iyang huna-huna.

Unta kung anaa kita sa kasuko ug kalagot dili angayng mu desisyon diha-diha dayun. Pamalandongan una, pangayoon ang presensya sa Espiritu Santo ug dili paharion ang garbo kundili ang pagpaubos. Tinood lisud apan paningkamutan.

Nagatuo ako nga ang mga maayong kinaiya, pamatasan, panghunahuna, ang pipila lamang sa mga hiyas sa maayong lider nga angayng himoong sumbanan sa pagka maaayong tawo.

Hinaut unta,
Vince

* * * * * *

Dear Vince,

Pagdayeg ug pasalamat sa Dios tungod naa kining imong grupo nga adunay tumong sa paghatag ug tabang sa mga nanginahanglan. Ang kinabuhi mahimong labing mahinungdanon kon ikaw mohimo og paagi sa pag-alagad sa uban bisan pa ginagmay lang kini. Ang maong mga lihok siguradong mahimong pila pa ka pilo sa mga gasa o panalangin gikan sa atong Ginoo og ibubo dinha balik kaninyo.

Isip usa ka grupo nga adunay parehas nga mga katuyoan, gikinahanglan ang maayo ug epektibo nga mga lider o opisyales (labi na ang kinatibuk-ang lider), aron masiguro ang sistematikong pagdumala sa mga kalihokan o paghatod sa mga serbisyo. Naay panultihon nga nag-ingon, “ang usa ka maayo nga lider usa ka maayo nga sumusunod”. Kini nagpasabot nga dili lang siya ang tighimo og desisyon, apan kinahanglang mosunod siya sa gikasabotan sa mga miyembro sa grupo nga girepresentahan sa mga opisyal.

Many heads are better than one. Busa, gikinahanglan ang dakong pagpaubos aron dawaton nga luag sa kasingkasing nga ang mga sugyot sa kinatibuk-ang lider mahimong dili mao ang gipili sa grupo. Hinuon, usahay makasakit kini sa iyang “ego”, apan kinahanglan andam siya nga dawaton ang kamatuoran nga naa pay ubang miyembro nga mas maayo ang mga ideya kumpara kaniya.

Importante sab kaayo ang komunikasyon aron molambo ang usa ka organisasyon. Ang tinuod nga lider epektibong makigsulti sa iyang mga miyembro. Atong himumduman nga ang organisasyon gilangkuban sa mga indibidwal nga adunay ilang mga kaugalingong katakus ug mga kahuyang o mga kasaypanan. Busa, kung adunay mga kalainan/dili pagsinabtanay, kini masulbad lamang pinaagi sa dayalogo diin ang mga nalambigit abli ang kaugalingon sa pagpaminaw sa usag-usa sa walay paghukom o judgment.

Dili nato kalimtan nga dili tanan gipanganak nga lider. Apan sa usa ka grupo, ang matag miyembro mahimong mobuhat sa mga tahas sa pagpangulo sa lain-laing mga kapasidad, sa lain-laing mga paagi ug parehas ra kini ka bililhon ug mahinungdanon. Mao nga ang tagsa-tagsa ka miyembro naa gyud mapaambit sa kalamboan sa tibuok nga grupo.

Padayon og pagpalambo sa inyong grupo ug paggamit sa inyong giftedness aron sa pag-alagad sa uban. Hinaut nga ang tanan ninyong serbisyo inubanan gyud sa gugma ug pagpaubos ug kining tanan alang sa pagdayeg ug pagmaya sa atong Ginoo, ug dili alang sa kaugalingon nga interes.

May God bless you more and more in all your selfless endeavors.

Ate Emz