Selebrasyon Sa Pagbalik-Misyon

Gisaulog ang pito ka tuig nga anibersaryo sa pagbalik-misyon sa DXGN 89.9 Spirit FM niadtong Hunyo 13, 2023 atol sa kapistahan ni San Antonio de Padua. Ang tanang staff duyog sa pipila ka mga Parish SoCCom members misuporta sa radyo pinaagi sa pagtambong sa Pontifical Mass nga alang usab sa selebrasyon sa ika-saysenta nga kapistahan sa Parokya sa San Antonio de Padua sa Agdao.

Alas dyes sa buntag, gisaulog ang Santos nga Misa nga gipangulohan ni Rev. Msgr. Julius Rodulfa nga mao ang Pastoral Director, Vicar General ug Episcopal Vicar for the Clergy sa Arkidayosis sa Dabaw ug gitambongan sa napulog-duha ka mga kaparian nga relihiyoso ug misyonero. Panahon sa Pontifical Mass, gibinditahan ug giinstalar ang relikya ni San Antonio.

Malipayong mitambong ang mga Parish SoCCOm sa St. Mary of the Perpetual Rosary Parish Buhangin, San Roque Parish Malabog, Immaculate Conception Parish Peñaplata, Our Mother of Perpetual Help Parish sa Bajada, Our Lady of the Miraculous Medal Parish sa Indangan og Virgen de los Remedios Parish sa Toril. Walay usa nga wala makaambit sa paniudto gikan sa parokya ug gikan pod sa mga parokyano nga mihimo ug mga purok gawas sa simbahan.

Tapos ang paniudto, nagtapok-tapok ngadto sa stage nga gitukod alang sa mga presentasyon sa bisperas sa kapistahan. Gipahigayon sa maong stage ang Fiesta Caravan ug gipaila-ila ang mga staff sa radyo ug mantalaan sa Davao Catholic Herald. Dunay mga padula nga gipahigayon og ang mga miapil nakadawat dinha sa Spirit FM merchandise nga mga paypay, baso ug uban pa.

Gilansad pod ang bag-ong programa sa radio nga mao ang DANGUPANAN nga nagsugod niadtong adlawa sa alas nwebe sa gabii hangtod sa alas onse. Gipaila-ila panahon sa caravan ang uban nga mga naglangkob sa maong proyekto labi na ang mga miyembro sa Family and Life Apostolate.

Giawhag sa DXGN Spirit FM Program Head nga si Ms. Annie Libres ang mga katawhan sa pagsuporta ug pagpaminaw sa bag-ong programa.

Pagkagabii, nahimutang gyod ang pagbroadcast sa pilot episode sa DANGUPANAN uban ang mga volunteer anchors nga sila si: Fr. Orlando Angelia, Fr. Ritsche Gamaya, Fr. Lito Doguiles, Dr. Jerson John Trocio, Sr. Leah Zosobrado, RVM, Dr. Jovy Gatan, Ms. Annie Libre, Mr. and Mrs. Cedrick and Mary Ann Batu, Gie Rhea Jadulco, Mr. Jerson Bontuyan, Mr. Dennis Mabayao, Ms. Nilda Rigodon og Christine Camus.

Mapasalamaton ang tanan, diha sa bag-ong programa nga gilaoman nga makadungag sa konkretong pagpakita sa pag-amuma sa simbahan ngadto sa iyang mga katawhan. Mapadayunon pa gihapon ang DXGN Spirit FM sa pagpalapnag sa gugma sa Dios!