Santacruzan sa Flores de Mayo

SANTACRUZAN-mao kini ang tradisyon sa mga katoliko gikan pa sa panahon sa Espanyol. Kini ang gipaabot sa pagselebrar sa panahon sa Flores de Mayo nga nagpahinumdom kanato sa kamahinungdanon sa atung pagtoo ug paghiusa.

Ang grupo sa Zone 4 sa Parokya sa Our Mother of Perpetual Help nga gilangkuban sa upat ka Gagmay’ng Kristohanong Katilingban (GKK) nga mao ang GKK Sto. Rosario, GKK San Miguel, GKK Sta.Maria ug GKK New Immaculate Concepcion. Gisaulog ang Culmination sa Flores de Mayo niadtong May 31, 2023 alas 4 sa hapon sa Sto. Rosario Gym Buhangin.

Kini inubanan sa tema nga Zone 4 Santacruzan 2023 IGP youth activity for a cause. Ang katuyuan sa maong kalihokan mao ang kahiusahan sa paghatag ug suporta sa pagpondo ug kwarta o income generating project alang sa ilang mga kabatan-onan sa umaabot nilang youth activities karong tuiga.

Ang programa nagsugod sa parada sa Santacruzan nga gipangulohan ni Ms. Cresencia Lazaga ang Hermana Mayor gikan sa GKK San Miguel. Kuyog kaniya ang mga maanyag nga rayna nga nilibot pinaagi sa pagsakay ug gituyok ang tibook utlanan sa Zone 4 uban ang banda sa DMMA nga maoy nagsilbing nagpabuhi sa maong parada. Human sa parada, gisunod dayon ang mubong programa diin ang parish worker nga si Babino Casanaan naghatag ug gamay’ng kasaysayan mahitungod sa santacruzan. Dayon, gipresentar sa Hermana Mayor ang napulo ka rayna nga nagrepresentar sa usa ka kinaiya o hiyas sa atong Birhen Maria. Mao kini ang mga highlights sa Santacruzan. Gitapos ang maong kalihokan pinaagi sa piktoryal ug salo-salo.

Dako ang garbo sa taga parokya tungod kay human sa panahon sa pandemya, ang Zone 4 ang unang naghimo ug inisyatiba alang sa kalamboan sa ilang kabataan. Ug dinhi sab masukat ang dakung pagtagad sa matag batan-on nga makakat-on pa ug dugang pagtoo sa Ginoo sa ilang maayong pagkapiniyalan.

Daku ang pasalamat sa mga Group Servant Leaders (GSL) sa matag komunidad sa GKK tungod sa suportang pinansyal, ug kooperasyon nga maoy tinubdan sa kalampusan.

Viva Santa Maria!

(Mary Grace Gonzales | OMPH Parish Soccom)