SAKRAMENTO SA KAMINYOON: Panglantaw sa Usa ka Katekista

Isip usa ka katekista ma-obserbahan nako kasagaran sa mga kasal ma individual wedding man o community wedding gipangandaman gayod, labi na ang individual wedding daghan ang mga tawo nga ma-involve niini aside sa mga ninong ug ninang, nakita og nasaksihan pud nako nga bongga gyod ang pagpangandam sa uban labi na nga naay kapasidad ang pamilya. Sa mga community wedding pinalahi sab, tungod kini pwede daghan nga paresan ang kaslon, tingalig mas gamay lang ang gasto. Apan para kanako, pareho lang ang individual wedding og ang community wedding ka mahinungdanon og kabililhon tungod pareha lang ang seremonyas o rito sa kasal nga ginagamit; ang importante nga ang gugma sa Dios ang sentro sa ilang kinabuhi isip managtiayon.

Sa dili pa sila kaslon ang mga katekista mohatag gyod og katekesis sa kaminyoon alang sa kaslonon uban sa mga ginikanan, ninong ug ninang og uban pa nga adunay kalambigitan sa kasal. Panahon na sa kasal, kaming mga katekista mo assist sa kasal aron matabangan nga mapadali ang paghan-ay nga mahimong solemne ang kasal, labi na ang pagassist sa tulo ka batang lalaki nga maoy magdala sa Bibliya, mga singsing og aras.

Kinahanglan usab ang pagpahinumdom sa Maid of Honor og Best Man kung unsa ang ilang tahas sa kasal labi na ang pagpapirma diha sa Marriage Contract matapos ang seremonyas. Kining bulan sa Hunyo, nindot paminawon nga adunay matawag nga June Bride, apan para sa akoa isip katekista sama ra ni nga nahimong tradisyon nga pagahinumdoman matag tuig. Dinhi sa among Parokya sa San Roque sa Malabog dili daghan ang nagapakasal sa bulan sa Hunyo, magdepende sa pagpangandam og pagpasa sa mga requirements sa kasal og ang marriage bans kon tawag sa kasal sulod sa tulo ka Domingo.

Matod pa sa Parish Secretary nga si Jenelyn M. Barahama dili gyod daghan ang nagapakasal sa bulan sa Hunyo. Sa akong kasinatian niining pagtabang sa mga kasal, makalipay ug makadasig nga adunay sagol nga kakulba o kahinam nga dili gyod nako tuyoon nga makaingon ko sa akong kaugalingon nga, “ay salamat sa Dios nakasal na gyod sila hinaot nga mag lig-on sila sa ilang kaminyoon uban sa grasya og panalangin sa Dios.” (Arlene Tarnate | San Roque Parish SoCCom – Malabog)